Қазақстан Республикасының мемлекеттік мерекесі – Астана күніне орай Өскемен қаласында мәдени, танымдық және шығармашылық шаралар легі ұйымдастырылады. Ұйымдастырушылардың айтуынша, бұл шаралар көрерменге әрі қызықты, әрі мазмұнды болмақ, деп хабарлайды Altainews.kz тілшісі.

2-7 шілде аралығында Оралхан Бөкей атындағы орталықтандырылған кітапхана жүйесінде (Славский жағалауы, 22) «Астана – Тәуелсіз елімнің Ақордасы!» атты кітап көрмесі өтеді. Көрмеде елорданың қалыптасу тарихы, сәулет нышандары мен мемлекеттік маңызы жайлы әдебиеттер ұсынылады. Басталуы – сағат 10:00-де.

Сол жерде және сол күні сағат 15:00-17:00 аралығында «Менің Отанымның Астанасы» атты виртуалды шындық форматындағы саяхат ұйымдастырылады. Қатысушылар елорданың көрікті жерлерімен виртуалды түрде таныса алады.

6 шілде күні сағат 10:00-де Ертіс өзені бойымен «Самал» саябағынан бастап «Ғашықтар аллеясына» дейін кемелер шеруі өтеді; сағат 12:00-де архитектуралық-этнографиялық музей-қорық аумағында «Мәңгілік елдің Елордасы» атты концерт өтеді. Онда өңірдің үздік вокалдық және би ұжымдары өнер көрсетеді; 11:00-17:00 аралығында Қасым Қайсенов атындағы саябақта «Шығыстың кәдесыйы - 2025» атты облыстық қолөнер фестиваль-байқауы өтеді. Фестивальдың мақсаты – Шығыс Қазақстандағы халықтық қолөнерді жаңғырту, сақтау және насихаттау. Бағдарламада ШҚО шеберлерінің өнімдері ұсынылған жәрмеңке; қолданбалы өнер бойынша шеберлік сабақтары – алаша, гобелен, өрнекті белбеулер тоқу, ши және қамыстан бұйымдар жасау, саздан мүсіндеу, киізден сырмақ басу, «біз кесте» тігу; аквагрим, лотерея, шоу-шеберлік сағаттар, балаларға арналған ойындар мен викториналар бар.

Сондай-ақ кәсіби және әуесқой әртістердің қатысуымен концерт ұйымдастырылып, «Шығыстың кәдесыйы - 2025» байқауының жеңімпаздары марапатталады.

Ұйымдастырушылар – ШҚО мәдениет басқармасы, Шығыс Қазақстан музей-қорығы және өңірлік қолөнершілер ресурстық орталығы бұл шараны тек мереке емес, дәстүр мен заманауилықты тоғыстыратын ұрпақтар диалогы ретінде сипаттайды.

7 шілде күні сағат 10:00-де Металлург саябағында салауатты өмір салтын ұстанушылар үшін спорттық бағдарлау чемпионаты өтеді.

Өскеменде өтетін демалыс күндерінің мерекелік бағдарламасы жан-жақты, мазмұнды әрі жұртты біріктіретін болмақ. Астана күні – басқалаға деген сүйіспеншіліктің белгісі ғана емес, ұлттық рухты сезінуге, тамырмен байланыс орнатуға, ел тарихының өңір тағдырынан көрініс табуына мүмкіндік беретін ерекше күн.

Дамир Омаров