2025 жылдың 1 тамызы мен 30 қыркүйегі аралығында Қазақстанның барлық өңірінде республикалық «Мектепке жол» қайырымдылық акциясы өтеді. Бұл дәстүрлі жоба әлеуметтік осал отбасылардан шыққан балаларға жаңа оқу жылына дайындалуға көмектесіп келеді. Биыл ол он алтыншы рет ұйымдастырылып отыр, деп хабарлайды Altainews.kz тілшісі.

Аталған жобаның бастамашысы – ҚР Оқу-ағарту министрлігі. Акцияның мақсаты – қиын өмірлік жағдайға тап болған балаларға білімге тең қолжетімділік беру және жаңа оқу жылына сәтті бастама жасау.

Министрліктің мәліметінше, келесі санаттағы балаларға атаулы көмек көрсетіледі:

• жетім балалар мен ата-анасының қамқорлығынсыз қалғандар;

• аз қамтылған және көпбалалы отбасылардан шыққан балалар;

• мүгедектігі бар балалар;

• төтенше жағдайлардан зардап шеккен балалар;

• сондай-ақ әлеуметтік қолдауды қажет ететін басқа да балалар.

Көмек көрсету форматы мектепке қажет заттар мен қызметтердің кең ауқымын қамтиды. Атап айтқанда мектеп формасы, кеңсе тауарлары, сөмке мен аяқ киім, оқулықтар мен басқа да оқу құралдары, сондай-ақ материалдық немесе басқа мақсатты көмек.

Қолдауға мұқтаж жандар ата-анасы немесе заңды өкілдерінің өтініші бойынша көмек ала алады. Сонымен қатар білім және әлеуметтік қорғау органдары тарапынан мұқтаждық фактісі анықталған жағдайда да көмек көрсетіледі.

Акцияға мемлекеттік органдар, бизнес өкілдері, қоғамдық ұйымдар, еріктілер бірлестіктері және жанашыр азаматтар қатысады. Министрліктің атап өтуінше, «Мектепке жол» жобасы осы жылдар ішінде шын мәнінде бүкілхалықтық бастамаға айналды.

Оған қатысу үшін өңірлік білім басқармаларына немесе мектептерге жүгінуге болады. Сол жерлерде көмекке мұқтаж отбасылардан өтініштер де қабылданады.

Айта кетейік, акция 2009 жылы басталғалы бері еліміз бойынша он мыңдаған оқушы көмек алған. Жоба қалалық және ауылдық аймақтарды қамти отырып, қоғам мен бизнестің кең қолдауына ие болып отыр. Республикалық «Мектепке жол» акциясы – ынтымақтастық пен өзара көмектің балалардың өмірін жақсы жаққа өзгерте алатынын дәлелдейтін бастама.

Дамир Омаров