Биыл Қазақстанда 80-нен астам вокзал пайдалануға беріледі
gov.kz
Елімізде теміржол вокзалдарын жаңғырту және күрделі жөндеу жұмыстары қарқынды жүргізілуде, деп хабарлайды Altainews.kz тілшісі ҚР Көлік министрлігінің баспасөз қызметіне сілтеме жасап.
Үкімет отырысында көлік вице-министрі Мақсат Қалиақпаров мәлімдегендей, жобаның тапсырыс берушісі – «Қазақстан теміржолы» ұлттық компаниясы, ал мердігер ұйымдар жергілікті атқарушы органдардың ұсынысымен анықталған.
– Қазіргі уақытта 100 нысан бойынша жобалық-сметалық құжаттама мемлекеттік сараптамадан өтуде. Қыс мезгіліне дайындық қамтамасыз етілген. Жолаушыларға арналған уақытша құрылыстар мен күту аймақтары әзір. 124 нысанның 121-інде құрылыс-монтаж жұмыстары жүргізілуде. Қалған үш вокзал тарихи-мәдени мұра тізіміне енген, сол себепті жөндеу 2026 жылы басталады, – деді вице-министр.
Мақсат Қалиақпаровтың айтуынша, вокзалдардың шамамен 70 пайызы соңғы 30 жылда жөндеу көрмеген. Техникалық тексеру барысында бірқатар тіреуіш бағандар мен конструкциялардың ақаулы екені анықталғандықтан, 42 нысан толықтай бұзылған.
– Биыл 80-нен астам вокзал пайдалануға беріледі. Жергілікті атқарушы органдар мен мердігер ұйымдар құрылыс-монтаж жұмыстарының қарқынын күшейтуі қажет, – деп түйіндеді ол.
Оқи отырыңыз
