«Қазгидромет» Шығыс Қазақстан облыстық филиалының мәліметінше, 13 қараша күні өңірдің басым бөлігінде ауа райы күрт бұзылады. Күні бойы жауын-шашын болады, жаңбыр мен қар аралас жауып, бұрқасындатып, көктайғақ күтіледі, деп хабарлайды Altainews.kz.

Облыстың солтүстігі мен шығысында қатты жауын-шашын жаңбыр мен қар түрінде өтеді. Түнде және таңертең тұман түсіп, желдің бағыты оңтүстік-батыстан солтүстік-батысқа ауысады. Кей өңірлерде желдің жылдамдығы 15–20 м/с, екпіні 25 м/с-қа дейін жетуі мүмкін.

Өскемен қаласында да ауа райы жайлы болмайды. Жаңбыр мен қар аралас жауын-шашын, бұрқасын және көктайғақ күтіледі. Күндіз желдің екпіні 15–20 м/с дейін күшейеді.

Төтенше жағдайлар департаменті тұрғындарға ескертеді:

• Мүмкіндігінше елді мекендерден алысқа шықпаңыз;
• Көлік жүргізгенде жылдамдықты азайтып, арақашықтықты сақтаңыз;
• Жаяу жүргенде абай болыңыз, көктайғақта асықпаңыз;
• Қатты жел кезінде сымдарға, бағаналарға, тербелетін заттарға жақындамаңыз;
• Ағаштардың астына және аялдама маңына тығылмаңыз;
• Төтенше жағдай орын алса, «112» нөміріне хабарласыңыз.

ШҚО ТЖД тұрғындарды ауа райының қолайсыздығына сақтықпен қарауға және қауіпсіздік шараларын қатаң ұстануға шақырады.