Теміржол — тек пойыздар жүйесі емес, ең алдымен қауіп жоғары аймақ. Бұл туралы Алтай стансасындағы көліктегі полиция бөлімшесінің қызметкерлері жиі ескертеді. Себебі соңғы жылдары темір жол маңында жарақат алу, тіпті адам өліміне әкелген оқиғалар да тіркеліп отыр, деп хабарлайды Altainews.kz.

Ең басты себеп — адамдардың немқұрайлығы мен қауіпсіздік ережелерін сақтамауы. Көп жағдайда тұрғындар «уақыт үнемдеймін» деп, пойыз өтетін жолдан өтіп кетуге тырысады. Ал балалар теміржолды ойын алаңына айналдырып, вагон үстіне мініп немесе жолда жүгіріп ойнайды. Мұның соңы ауыр жағдайға әкелуі мүмкін.

Полицейлердің айтуынша, жаяу жүргіншілер тек арнайы белгіленген өткелдермен ғана өтуі тиіс. Бұдан бөлек, кей жерлерде аспалы көпір немесе арнайы төсемелер бар — дәл сол жерлерден өту қауіпсіз.

Қауіпсіздік мәдениетін қалыптастыру мақсатында көліктегі полиция бөлімі мектептерде жүйелі түрде түсіндіру сабақтарын өткізіп келеді. Сабақ барысында оқушылар теміржолдағы ережелермен, жол белгілерімен және сақтық шараларымен танысады.

Есте сақтаңыз:

Темір жолдан тек рұқсат етілген жерден өтіңіз;

Балаларыңызға қауіпсіздік ережелерін үйретіңіз;

Вагондарға жақындамаңыз, астынан өтпеңіз;

Фото: Қазақстан темір жолы