Шығыс Қазақстан облысы Күршім ауданына қарасты Маралды ауылындағы 8 бас мал өліміне қатысты жан-жақты жүргізілген зерттеудің нәтижесі шықты, деп хабарлайды Altainews.kz тілшісі.

Еске салсақ, 19-20 қыркүйекте Маралды ауылында 8 бас мал өлімі тіркелді. ШҚО әкімі Нұрымбет Сақтағановтың тапсырмасымен дереу құрылған арнайы топ оқиға орнына жедел жетіп, мәселені жан-жақты зерделеуді бастады. Мал өлекселерінен, су мен топырақтан сынама алынып, ветеринариялық зерттеулер, вакцина егу және дезинфекциялау жұмыстары жүргізілді. 

Экологтар жүргізген зерттеу нәтижесіне сәйкес, рН деңгейі, қалқымалы заттар, аммоний, мұнай өнімдері, цианид, ауыр металдар және басқа да элементтер бойынша шекті рұқсат етілген мөлшерден асып кету фактісі тіркелмеді.

Ал бүгін Маралды тұрғындарымен кездесу өтіп, ветеринар мамандар жүргізген зерттеу жұмыстарының қорытындысы жария етілді.

Қазіргі уақытта Маралды ауылындағы эпизоотиялық жағдай тұрақты. Жаңа мал өлімі тіркелмеген. Ветеринарлар күн сайын малдың жай-күйін қадағалап отыр. 

Сондай-ақ мал өлімі себептерін тереңірек зерттеу мақсатында су, жайылымдағы жем-шөп және өзге де сынамалар тұрақты түрде алынып, зертханалық сараптама жүргізіліп келеді.