Астанаға ресми сапармен келген Финляндия Республикасының Президенті Александр Стубб Қазақстан Республикасының Президенті Қасым-Жомарт Тоқаевпен келіссөздер өткізді. Кездесуде мемлекеттер арасындағы саяси, сауда-экономикалық және гуманитарлық байланыстарды дамыту, сондай-ақ өңірлік және халықаралық күн тәртібіндегі өзекті мәселелер талқыланды, деп хабарлайды Altainews.kz Ақордаға сілтеме жасап. 

Президент Қасым-Жомарт Тоқаев Финляндияны Қазақстанның Солтүстік Еуропа мен Еуропалық одақтағы басты серіктестерінің бірі екенін атап өтті. Мемлекет басшысы фин елінің таза энергетика, технология, цифрлық инновация, экологиялық жауапкершілік және білім беру салаларындағы жетістіктері әлемдік деңгейде мойындалғанына назар аударды.

Мемлекет басшысы инвестиция және сауда салаларында бірқатар жаңа мүмкіндік бар екенін айтып, фин бизнесмендерін Қазақстандағы қолайлы инвестициялық орта мен Орталық Азияның кең нарығына шығу мүмкіндігін пайдалануға шақырды.

Финляндия Президенті Александр Стубб өз сөзінде екі ел арасындағы байланыстардың қарқынды дамып келе жатқанын атап өтті.

Сондай-ақ, тараптар халықаралық қауіпсіздік, өңірлік тұрақтылық және жаһандық сын-қатерлерге бірлесіп жауап қайтару мәселелерін талқылады.

Келіссөз қорытындысы бойынша Қасым-Жомарт Тоқаев пен Александр Стубб Бірлескен мәлімдемеге қол қойды. Құжатта екі елдің ортақ ұстанымдары мен жаңа бастамалары көрініс тапқан.