Бүгін Ауыл шаруашылығы еңбеккерлерінің екінші форумында Жұмысшы мамандық жылына орай Шығыс Қазақстан облысының агроөнеркәсіп саласы қызметкерлері ел Президенті Қасым-Жомарт Тоқаевтың қолынан орден алып, ерекше құрметке ие болды, деп хабарлайды Altainews.kz тілшісі. 

Жерлестеріміз – катонқарағайлық «Верх-Катунь» ЖШС-нің бас зоотехнигі Манарбек Мүбәракұлы Абдуллин және самарлық «Ахмадиұлы» шаруа қожалығының басшысы Бауыржан Ахмадиұлы Рапеков III дәрежелі «Еңбек даңқы» орденімен марапатталды.

Президент қолынан ауыл шаруашылығы саласының 30 еңбеккері мемлекеттік награда алды. Атап айтқанда, бір адам – «Парасат» орденінің кавалері, саланың 6 өкілі «Құрмет» орденінің иегері атанды. II дәрежелі «Еңбек даңқы» орденімен бір азамат, III дәрежелі «Еңбек даңқы» орденімен он адам, «Ерен еңбегі үшін» медалімен алты еңбеккер марапатталды.

Сондай-ақ, бүгінгі іс-шарада «Қазақстанның аграрлық саласының еңбек сіңірген қайраткері» құрметті атағы ауыл шаруашылығы саласында озат атанған төрт азаматқа алғаш рет тапсырылды.

Ел Президенті еңбеккерлерге алғысын білдіріп, ауыл шаруашылығын қолдаудың маңыздылығын атап өтті.

Ержан Әбіш 

Фото: Видео кескіндемесі