ШҚО санитарлық-эпидемиологиялық бақылау департаменті мониторинг нәтижелерін жариялады. 
Жылдың бірінші тоқсанында департамент қызметкерлері әртүрлі көздерден 216 су сынамасын алған. Осы зерттеу жұмыстарының нәтижесінде бірнеше елді мекенде су сапасының нашар екені анықталған, деп хабарлайды Altaynews тілшісі. 
Департамент мәліметі бойынша, микробиологиялық көрсеткіш бойынша Шығыс ауылынан, Самсоновка кентіндегі №2 ұңғымадан, Кандыковка, Крюковка, Ново-Ильинка елді мекендеріндегі тарату желілерінен алынған су сынамалары талапқа сай келмеген. 

Шемонаиха және Волчанка ауылының тарату желілерінен алынған сынамалар да санитарлық-химиялық көрсеткіштер бойынша талапқа сай емес екен. 
Шаруашылық жүргізуші мекемелер дезинфекция және желілерді шаю сынды шаралар жүргізді. Мамандардың мәліметінше, қайта алынған су сынамалары ауызсу гигиеналық талаптар үдесінен шығатынын көрсеткен.