Өскеменнен Катонқарағай мен Ақжарға автобус қатынайтын болады
Фото: articles-center.com
Өскемен қаласынан аудан орталықтары – Катонқарағай және Ақжар ауылдарына автобус маршруттарын ашу жоспарланып отыр, деп хабарлайды Altainews.kz тілшісі.
– Басқарма тарапынан Өскемен – Алтай – Катонқарағай және Өскемен – Ақжар бағыттарында жолаушы автобустарының қатынасын ашу қарастырылуда. Қазіргі уақытта Өскемен – Шемонаиха маршрутында автобустар жүріп жатыр. Сәуірдің аяғына таман Өскемен – Күршім арасында автобус жүре бастайды, – деп мәлімдеді ШҚО жолаушы көлігі және автомобиль жолдары басқармасы басшысының орынбасары Айжан Рахимбаева Өңірлік коммуникациялар қызметінің алаңында өткен брифинг барысында.
Сонымен қатар басқарма шағын кемелерді басқаруға куәлік беру, жолаушыларды автобустармен тасымалдауға лицензия беру, әлеуметтік маңызды маршруттарды субсидиялау бойынша осы жылдың алғашқы тоқсанында 94 мемлекеттік қызмет көрсеткен. 2023 жылдың ұқсас кезеңімен салыстырғанда көрсетілген қызметтер саны 15%-ға ұлғайған.
Басқарманың ресми сайтында ұсынылатын мемлекеттік қызметтер бойынша қажет ақпарат орналасқан.
Барлық қызметтер автоматтандырылған, қызмет алушының қызмет берушімен жеке байланысы алынып тасталған.
Оқи отырыңыз
