Алдағы референдум аясында ақпараттандыру аса маңызды рөлге ие. “Иә” немесе “жоқ” деп жауап беру үшін әр азаматта негіз боларлық ақпарат қажет-ақ, бұл тұрғыда Халықтық штабтың мүшелері ауқымды істер атқаруда, деп хабарлайды Altainews.kz тілшісі.

Олар Зайсан ауданы Айнабұлақ ауылының тұрғындарымен кездесіп, атом электр станциясы салынуының маңыздылығы туралы тарқатып, азаматтардың көкейкесті сұрақтарына жауап берді.

Атом энергиясын бейбіт мақсатта Қазақстанның экономикасын дамытуға пайдалану туралы шешімнің ар жағында елдің экономикалық дамуы, қоғамдағы әлеуметтік тұрақтылық пен халықтың әл-ауқатының артуы, экологиялық мәселелерді шешу жатқанын ескерген жөн. 

Тұрғындармен кездесуге аудандық «Достық» газетінің редакторы Нұргүл Қалықова,  аудандық мәслихат депутаты Ризабек Шәкенұлы, ардагерлер кеңесінің төрағасы Тұрсынхан Молдаханов қатысты.