Зайсан ауданының тумасы Нұрлан Байғалиев пауэрлифтинг спортынан өзінің ерекше жетістіктерімен еліміздің мақтанышына айналды. Жақында ол Қырғызстанның астанасы Бішкекте өткен пауэрлифтингтен Әлем Чемпионатында 4 алтын медаль жеңіп алып, екі бірдей әлемдік рекорд орнатты. Бұл жеңіс оның ұзақ жылдар бойы қажырлы еңбегінің және табанды жаттығуларының жемісі,- деп хабарлайды  Altainews.kz  тілшісі.

Нұрлан Байғалиев пауэрлифтингпен 2013 жылдан бастап кәсіби түрде айналысып келеді. Бірақ спортқа деген қызығушылығы бала кезден басталған. 1984-1986 жылдары әскерде қызмет еткен уақытта самбо күресімен айналысып, бірнеше мәрте батальон және полк чемпионы атанған. Әскерден кейін туған жеріне оралып, самбо және қазақша күреске ден қойды. Оның алғашқы жаттықтырушысы Зейнолда Рахимбаев болды. Кейін өзі де жаттықтырушы болып, жас спортшыларға тәлім бере бастады.

2013 жылы пауэрлифтингке бет бұрып, бұл спорт түрінде өзін жан-жақты дамытты. 2017 жылы Алматыда өткен Қазақстан Чемпионатында жүлделі екінші орынға ие болып, спорттық мансабындағы алғашқы ірі жеңісін тойлады. Сол кезден бастап ол Қазақстан, Азия және Әлем чемпионаттарында үздік нәтижелер көрсетіп, ел намысын абыроймен қорғап жүр.

Нұрлан Байғалиев 1966 жылы 6 сәуірде Зайсан ауданының Дайыр ауылында дүниеге келген. Әкесі Зағиолда Байғалиев құрылыста еңбек етіп, ауылдың құрметті азаматы атанған. Анасы Әуесхан Байғалиева үй шаруасымен және бала тәрбиесімен айналысты. Осындай қарапайым отбасында тәрбиеленген Нұрлан еңбекқорлық пен табандылықты бойына сіңірді.

Ол 1999 жылы отбасын құрған. Бүгінде жұбайы екеуі үш баланы тәрбиелеп отыр. Ұлы Алдияр — Шығыс Қазақстан техникалық университетінің студенті, үлкен қызы Айым Қытайда магистратурада оқиды, ал кіші қызы Айдана — мектеп оқушысы.

Нұрлан Байғалиевтің спорттық мансабы жеңістерге толы. Ол Қазақстан, Азия және әлемдік деңгейдегі жарыстарда топ жарып, Қазақстанның көк туын асқақтатты. Оның жеңісті жолындағы негізгі жетістіктерін атап өтсек:

• 2017 жылы Алматыда өткен Қазақстан чемпионатында — 2-орын.
• 2018 жылы Азия чемпионатында — 1-орын.
• 2019 жылы Екатеринбургтегі Еуропа чемпионатында — 3 алтын және 1 күміс.
• 2021 жылы Шымкентте өткен Қазақстан кубогында — 4 алтын.
• 2023 жылы «Кубок Мира» жарысында — 4 алтын.
• 2024 жылы Бішкекте өткен Әлем чемпионатында — 4 алтын және 2 әлемдік рекорд.

2024 жылдың қазан айында Бішкекте өткен Әлем чемпионатында Нұрлан Байғалиев екі әлемдік рекорд орнатып, спорт тарихына есімін мәңгілікке жазды. Оның спорттағы жетістіктері тек жеке мансабын ғана емес, сонымен қатар Қазақстанның халықаралық аренадағы беделін арттыруға үлкен үлес қосуда.

Нұрлан Байғалиев – табандылықтың, қажырлы еңбек пен патриотизмнің жарқын үлгісі. Оның спорттағы жетістіктері жас ұрпаққа үлгі болып, спорт арқылы биік белестерге жетуге болатынын дәлелдейді. Бүгінде ол тек чемпион ғана емес, сонымен қатар елдің абыройын асқақтатып жүрген азамат. Оның алдағы жеңістері мен табыстарына барша қазақстандықтар тілекші.

Ақерке Рағызбаева