Астанада Қазақстанның түкпір-түкпірінен келген 200-ге жуық баланың қатысуымен «Тең мүмкіндіктер» республикалық инклюзивті спорт фестивалі өтті. Осы байқауда ШҚО Глубокое ауданындағы Белоусовка орта мектебінің оқушылары жеңіске жетіп, бірінші орынды иеленді, деп хабарлайды Altainews.kz тілшісі.

Облыстық іріктеу кезеңінен өткен Белоусовка орта мектебінің үш оқушысы – Александр Колтунов, Олег Панов, және Егор Максименко – Астанада өткен финалдық кезеңде командалық жарыста жеңіл атлетикадан үздік нәтиже көрсетті. Жүлдемен оралған оқушыларды Өскемен вокзалында сыныптастары мен ұстаздары зор құрметпен, гүл шоқтарымен қарсы алды.

Егор Максименконың анасы Марина ұлының жеңіл атлетикадан бөлек, футбол мен шахматқа да әуестігін мақтанышпен жеткізді. Жазда «Балдаурен» лагерінде өткен шахмат жарысында бірінші орын алған Егор бұл жолғы жеңісін де алғаш болып анасына сүйіншілегенін айтты. «Бізді осындай ықыласпен қарсы алады деп ойлаған жоқпыз», – деп қуанышын бөлісті анасы.

Айта кетейік, ерекше қажеттіліктері бар балаларды қолдауға бағытталған «Тең мүмкіндіктер» фестивалі «AMANAT» партиясы Әйелдер қанатының бастамасымен «Кедергісіз келешек» жобасы аясында Оқу-ағарту министрлігімен бірлесіп ұйымдастырылды.

Жанаргүл Көкенайқызы