Ел Президенті Қасым-Жомарт Тоқаев өзінің Жолдауында экологиялық ахуалды жақсартудың елдің басты міндеттерінің бірі екенін атап өтіп, қоғамда қоршаған ортаны қорғаудың мән-маңызын кеңінен дәріптеу қажеттігін ерекше атап өткен болатын. Бұл мәселе мемлекетіміздің болашағы үшін аса маңызды, себебі экология мен тазалық қоғамның жалпы денсаулығына және болашақ ұрпақтың өмір сүру сапасына тікелей әсер етеді, деп хабарлайды Altainews.kz тілшісі. 

Президенттің бастамасы ретінде қолға алынған «Таза Қазақстан» акциясы тек көше сыпырып, ауламызды тазартудан тұрмайды. Бұл шараның мәні әлдеқайда тереңде жатыр. Ол қоғамның санасын тазартуға, рухани тазалыққа бағытталған үлкен қозғалыс болып табылады. Қоршаған ортаны таза ұстау, табиғатқа деген құрмет пен ұқыптылық тәртібін қалыптастыру – бұл әрекет тек бүгінгі күнмен шектеліп қалмайды, ол болашақ ұрпақтың мінез-құлқына да ықпал ететін аса маңызды тәрбие құралына айналады.

Экология мен тазалық мәселелерінде маңызды рөл атқаратын бір фактор – ол рухани тазалық. Бұл жөнінде облыс әкімі бірнеше рет айта отырып, «сынған терезелер теориясы» туралы сөз қозғады. Бұл теория бойынша, егер елді мекендерде қираған ғимараттар мен шашылған қоқыстар болса, онда қоғамдағы тәртіпсіздік пен жайсыздықтың орын алуы әбден мүмкін. Мұндай көріністер адамдардың көңіл-күйіне әсер етіп, қоғамның жалпы психологиясын бұзады. Сондықтан осы мәселені кешенді түрде шешу аса маңызды. Күл-қоқыстарды дер кезінде шығарып, адамдардың демалатын, жиналатын орындарын ретке келтіру арқылы қоғамның моральдық деңгейін көтеруге болады.

Зайсан ауданының әкімдігі осы бағытта нақты жұмыстар жүргізуде. Аймақтағы апатты құрылыс нысандарын бұзып, олардың орнына аббаттандыру шараларын қабылдау, Зайсан қаласы мен аудандағы басқа да ауылдарды жарықтандыру мәселесін шешу жоспарланған. Бұл жұмыстардың барлығы ауданның көркін жақсартуға және тұрғындардың өмір сапасын арттыруға бағытталған.

Таза Қазақстан акциясы аясында қоғамның әр мүшесі өз жауапкершілігін түсініп, тазалық мәселесінде белсенді түрде әрекет етуі керек. Әрбір азамат қоршаған ортаны, өз үйін, айналасын құрметтеуге және бағалауға үйренуі қажет. Балаларымызды табиғатқа ұқыпты қарауға, қарапайым мінез-құлық нормаларын үйретуге міндеттіміз. Бұл тәрбиені ата-ана, ұстаздар және қоғам болып бірлесіп жүзеге асыруымыз керек. Сонымен қатар, халықтың ортақ абыройы үшін еңбек ету әрқайсымыздың қолымызда. Қоғамдағы тазалық, тәртіп және экология мәселесіне қатысты әркімнің жеке жауапкершілігі болатынын ұмытпауымыз керек.

Зайсан ауданында экология мен тазалық мәселесіне ерекше көңіл бөлінуде. Әкімдік қалпына келтіру, аббаттандыру жұмыстарын жүйелі түрде жүргізіп, апатты ғимараттарды жою, қоғамдық орындарды ретке келтіру шараларын қолға алды. Бұл жұмыстарға облыс бюджетінен қаржы бөлініп, нақты нәтижелерге қол жеткізілуде. Мысалы, қазіргі уақытта аудандағы бірнеше елді мекендерде көше жарықтандыру жұмыстары жүзеге асырылып, «Таза Қазақстан» акциясына сәйкес тазалық шаралары жүргізілуде.

«Таза Қазақстан» акциясы – тек көше тазалығына ғана емес, жалпы экологиялық ахуалды жақсартуға бағытталған ұлы бастама. Бұл шараның аясында әрбір азаматтың белсенді қатысуы, табиғатқа деген құрмет пен тазалықты сақтау міндеті үлкен маңызға ие. Елдің экологиялық жағдайын жақсарту үшін әрқайсымыздың санамызды өзгертуіміз керек. Күл-қоқысқа қарсы күрес, экологиялық сана қалыптастыру, балаларды табиғатты қорғауға тәрбиелеу — бұл тек еліміздің болашағы үшін ғана емес, әрбір азаматтың жеке жауапкершілігі болып табылады.

Зайсан ауданының тұрғындары да осы бастаманы қолдап, экологиялық ахуалды жақсартуға өз үлестерін қосып жатыр. Әкімдік тарапынан қабылданып жатқан шаралар мен жұмыстар нәтижелі болады деп сенеміз. Қоғамның санасын өзгерту, тазалықты сақтау тек жергілікті деңгейде ғана емес, бүкіл еліміз бойынша қолдау табатын басты мақсатқа айналады. Бәріміз жұмыла отырып, ортақ абырой үшін еңбек етуге тиіспіз.