Қазақстан Республикасының Бас прокуроры Берік Асылов өткен жылғы қадағалау жұмысының негізгі нәтижелерін қорытындылап, 2025 жылға арналған басымдықтарды атады. Прокуратура заңдылықты сақтау, ұйымдасқан қылмысқа, көлеңкелі экономикаға және алаяқтыққа қарсы күрес, инвестициялық жобаларды қорғау, сондай-ақ халықтың әлеуметтік осал топтарының құқықтарын қорғау бойынша кешенді шараларды жалғастырмақ, деп хабарлайды  Altainews.kz тілшісі.

Әлеуметтік-экономикалық салада прокурорлар жүз мыңдаған азаматтың, оның ішінде зейнеткер, әлеуметтік осал топ, жасөспірім, жұмыскер, сондай-ақ үлескер және ипотека алғандардың құқықтарын қорғады. Сонымен қатар кәмелетке толмағандардың құқықтарын қорғау – тұрақты назарда. Балалардың проблемалары уәкілетті мемлекеттік органдардың шешімдерін тексеру, талдау немесе бағалау арқылы ғана емес, жобалау құралдарын пайдалану жолымен де шешімін тауып жатыр.

Мемлекеттің мүліктік мүдделерін қорғауға қатысты айтсақ, өткен жылы мемлекетке 627 млрд теңге сомасында залал өтелді, оның ішінде бюджеттен ұрланған қаражаттан басқа, жылжымалы және жылжымайтын мүлік, 91 млрд теңгеге өзге де материалдық құндылықтар бар.

Мемлекеттік сатып алу туралы заңнаманың сақталуын қадағалау шеңберінде мыңнан аса қадағалау актісі енгізілді, мемлекет пайдасына 12,7 млрд теңге өндірілді, 399 млрд теңгеге 500-ге жуық конкурстың күші жойылды. Қадағалау нәтижесін масс-медиада үнемі жарияланып отырды.

Алдағы кезеңде прокурорлар Мемлекет басшысының инвестициялық жобаларды сүйемелдеу және жеке бизнесті қорғау жөніндегі тапсырмаларын сапалы іске асыру, халықтың әлеуметтік осал топтарының, әсіресе балалардың құқықтарын сақтау, есірткі бизнесіне және ҰҚТ-ға қарсы күресті үйлестіру, алаяқтыққа қарсы іс-қимыл, азаптаулардың алдын алу, сондай-ақ «Заң және тәртіп» қағидатының орнығуын қамтамасыз етуді жалғастырмақ.