Шығыс Қазақстан облысына жұмыс сапары аясында ҚР Премьер-министрінің орынбасары Қанат Бозымбаев Өскемендегі энергетика саласындағы ең ірі кәсіпорындардың бірі – «Өскемен ЖЭО» ЖШС нысанында болды, деп хабарлайды Altainews.kz тілшісі.

Өскемен жылу электр орталығы - облыстың ғана емес, тұтас өңірді жылу және электр энергиясымен қамтамасыз етудегі тірек кәсіпорын. Қаладағы тұтынушылардың 80 пайыздан астамын үздіксіз жылумен қамтып отырған бұл станция өндірістік алыптардың да тұрақты жұмыс істеуіне серпін беріп отыр.
Сапар барысында Қанат Алдабергенұлы кәсіпорынның құрылымдық ерекшеліктерімен, өндірістік технологиялық үдерістермен танысып, өткен жылыту маусымының қорытындылары және алдағы жоспарлар туралы ақпарат алды. Облыс әкімі Нұрымбет Сақтағанов өңірдегі энергетика саласындағы жүйелі жұмыстар барысын тарқатты.

Биыл тоғыз қазандық агрегатын және сегіз турбиналық агрегатты күрделі жөндеу көзделіп отыр. 2025 жылы жаңғырту және құрылыс жұмыстарына барлығы 17,6 миллиард теңге көлемінде инвестиция бағытталмақ. Оның ішінде 7,5 миллиард теңге - Энергетика министрлігі бекіткен «Тарифті инвестицияға айырбастау» бағдарламасы аясындағы арнайы инвестициялық бағдарлама бойынша бөлінбек.

Жүзеге асырылатын бұл жобалар станцияның техникалық тозу деңгейін төмендетуге, өндірістің сенімділігін арттыруға және өңір тұрғындары мен кәсіпорындарының энергетикалық қауіпсіздігін нығайтуға бағытталған.

Фото: Махаббат Ахметжанова