Шығыс Қазақстанда жаз басталғалы бері балалар лагерьлерінің қызу маусымы жүріп жатыр. Облыс бойынша 92 лагерь 26 мамырдан, тағы 178 лагерь 2 маусымнан бастап жұмысқа кіріскен. Қазірдің өзінде мыңдаған бала жазғы демалысын қызықты әрі пайдалы өткізуде. Жазғы ойындар, спорт жарыстары, өнер кештері мен шығармашылық сабақтар – бәрі осы лагерьлердің күн тәртібінде, деп хабарлайды  Altainews.kz тілшісі.

Солардың бірі – қала сыртындағы «Дарын» жазғы сауықтыру лагері. Табиғаты көркем жерде орналасқан бұл лагерьде қазір 300-ге жуық бала демалып жатыр. Лагерь басшысы Алена Гильманованың айтуынша, биыл бес ауысым жоспарланған. Балалардың көпшілігі – түрлі олимпиада, жарыс жеңімпаздары мен оқу озаттары. Олардың 180-і «Қазақстан халқына» қорының тегін жолдамасымен келген. Қалғандары – ақылы негізде келген оқушылар. Айта кетейік, он күндік жолдама бағасы – 132 000 теңге.

Мирас Нұрамхан – осындай тегін жолдамамен келіп, өзге балалармен бірден тіл табысып кеткендердің бірі. 8-сыныпта оқитын Мирас түрлі үйірмелерге, концерттерге қатысқанды жақсы көреді. Ең қызығы – ол теннис ойнағанды ерекше ұнатады екен, тіпті лагерьде жаңа достарын да осы спорт түріне баулып жүр.

Лагерьде спорт алаңдары, бассейн, сондай-ақ балалардың қызығушылығына қарай әртүрлі 15-тен астам үйірме бар. Оның ішінде робототехника, журналистика, сурет, ғылыми жобалар, ұлттық дәстүрлерді үйрету, қыздарға тігін үйірмесі де бар. Балалар күніне бес рет тамақтанады, ал олардың денсаулығын дәрігерлер күн сайын бақылап отырады. Лагерь аумағы – 8 гектар, барлық нысандар бейнебақылаумен қамтылған. Әр топқа тәлімгер мен тәрбиеші бекітілген.

Облыстық білім басқармасы басшысының орынбасары Алима Ақылбектің айтуынша, биыл қала сыртында 12 лагерь жұмыс істейді. Оның жетеуі – мемлекеттік («Жігер», «Дарын», «Балауса», «Болашақ», «Балдәурен», «Төменгі Тайынты», «Патшалар жазығы»), бесеуі – жекеменшік («Алау», «Синегорье», «Арайлы Шығыс», «Балақай», «Приморск»). Олардың бесеуі жағажай аймағында орналасқан.

Суға түсу маусымы басталмай тұрып, облыстық төтенше жағдайлар департаментінің мамандары су астын тексеріп, тазарту жұмыстарын жүргізген. Қазір барлық лагерьлерде қауіпсіздік ережелері жазылған стендтер орнатылған.

Жаз – балалардың дамып, тынығуына, жаңа достар тауып, қызықты естеліктер жинауына таптырмас мүмкіндік. Ал лагерь – сол көңілді шақтың қайнар көзі.

Фото/видео: Жәнібек Ырысбай