Елімізде ішкі туризмді дамыту және туристік аймақтарға баруды жеңілдету мақсатында республикалық маңызы бар автожолдар жөнделіп жатыр. Бұл жұмыстар Қазақстанның 8 өңірінде жүргізілуде. Биыл жаңартылып жатқан жолдардың жалпы ұзындығы 1 900 шақырымға жуық, ал 2025 жылға қарай 544 шақырымнан астам жол жөнделмек, деп хабарлайды Altainews.kz тілшісі.

Ақмола облысында «АЛЖИР» мемориалды кешеніне апаратын «Астана – Қорғалжын» жолының бір бөлігі жөнделіп жатыр. Бұл кешен елордадан небәрі 35 шақырым жерде орналасқан. Қазір 19-58 шақырым аралығындағы бөлігінде орташа жөндеу жұмыстары басталды.

Алматы облысында туристер жиі баратын Көлсай мен Қайыңды көлдеріне апаратын жолдар жөнделуде. «Көкпек – Кеген – Саты» бағыты бойынша бірқатар учаскеде жол жаңартылып жатыр. Сонымен қатар, Қырғызстанмен шекараға дейін баратын жолдың кейбір бөліктері де жөнделуде.

Жетісу облысында Алакөл көліне апаратын «Үшарал – Достық» жолы түгелдей жаңартылып жатыр. Сондай-ақ, танымал табиғи орын – Әнші құмға апаратын жолдың үш бірдей учаскесінде жөндеу жұмыстары жүргізілуде.

Батыс Қазақстан облысында тарихи маңызды Хан Ордасы ауылына апаратын жолдың барлық ұзындығы жөнделіп жатыр.

Қарағанды облысында Қарқаралы бағыты бойынша да жаңарту жұмыстары жүргізілуде. «Қарағанды – Аягөз – Бұғаз» автожолының 98 шақырымдық бөлігі жөнделуде.

Шығыс Қазақстан облысында Катонқарағай мен әйгілі «Рахман қайнары» шипажайына апаратын жолдың 152 шақырымдық учаскесі жаңартылып жатыр.

Павлодар облысында «Баянауыл» курорттық аймағына апаратын жолдың 82–231 шақырым аралығы жөнделіп жатыр. Оның ішінде бір бөлігі биыл күрделі жөндеуден өткен.

Түркістан облысында тарихи Сауран қалашығына апаратын жолда да орташа жөндеу жұмыстары қолға алынған.

Бұл жұмыстар ел азаматтарының саяхаттауына қолайлы жағдай жасап қана қоймай, жол қауіпсіздігін арттырып, туризм саласының дамуына оң әсер етпек. Жаңартылған жолдар арқылы туристік орындарға жету оңайлап, өңірлердің тартымдылығы арта түспек.

Дереккөз: «ҚазАвтоЖол» АҚ