Облыстағы сауда орындары мен кәсіпкерлік субъектілері арасында меморандумдар жасалып, өнімді төмен сауда үстемесімен ұсыну қарастырылған. «Ертіс» әлеуметтік-кәсіпкерлік корпорациясы 2025–2026 жылдардағы маусымаралық кезеңге қажетті картоп, сәбіз, пияз және қырыққабат өнімдеріне келісімшарттар бекіткен. 

Атап айтқанда:

• картоп – 2000 тонна,

• сәбіз – 900 тонна,

• пияз – 600 тонна,

• қырыққабат – 900 тонна.

Қазіргі таңда облыс бойынша әлеуметтік бұрыштар саны – 227. Бұл сауда нүктелерінде тауарлар 7%-дан аспайтын үстемемен сатылады. Сонымен қатар, өңірдің ауыл шаруашылығы өндірушілері өнімдерін еш үстемесіз ұсынатын 263 жеңілдетілген сауда орны жұмыс істеп тұр.

Әлеуметтік тауарлардың бағасы мынадай:

• картоп – 263 тг/кг

• сәбіз – 288 тг/кг

• пияз – 228 тг/кг

• қырыққабат – 263 тг/кг

• күріш – 432 тг/кг

• қарақұмық – 181 тг/кг

• күнбағыс майы – 720 тг/л

• қант – 417 тг/кг

• рожки – 305 тг/кг

Облыс аумағында ауыл шаруашылығы жәрмеңкелері де үздіксіз өткізіліп келеді. Жыл басынан бері өңірде 160-тан астам жәрмеңке ұйымдастырылған. Осы арқылы тұрғындар өнімді делдалсыз, қолжетімді бағамен сатып алу мүмкіндігіне ие. Азық-түлік тапшылығының алдын алу үшін облыста тұрақты мониторинг жүргізіліп отыр. Сауда нысандарындағы баға мен өнім қоры күн сайын тексеріледі. Әкімдік мәліметінше, 1000-ға жуық жеткізуші, өндіруші және сауда орны әлеуметтік келісімдерге тартылған.

Облыс әкімі Нұрымбет Сақтағанов келесі кезеңге дайындықты ертерек бастау қажет екенін атап өтті. Аймақ басшысы 2026 жылғы көктем-жаз маусымына арналған келісімдерді биылғы тамыз айында, ал 2026–2027 жылғы күз-қыс маусымына арналған құжаттарды қыркүйекте рәсімдеуді тапсырды. Сонымен қатар, «Алтай» көтерме-реттеу орталығы арқылы форвардтық келісімдер жасау мәселесі де назарда болмақ.