Биыл Ұлы Жеңістің 80 жылдығы – ел жадындағы ерекше белес. Сұрапыл соғыс жылдары алыстаған сайын, батырлардың ерлігіне деген құрмет те тереңдей түсуде. Осы орайда, 9 мамыр күні Шығыс Қазақстан облысының орталығы – Өскемен қаласында Жеңіс күніне арналған мазмұнды әрі тағылымды шаралар өтті, деп хабарлайды Altainews.kz тілшісі.

Салтанатты күннің шымылдығын мерекелік концерт ашты. Жан тебірентерлік әндер шырқалып, жауынгерлердің ерлігіне құрмет көрсетілді. Кештің ең әсерлі сәттерінің бірі дәстүрге айналған «Шырақ жағу» акциясы болды.

Даңқ мемориалының алдындағы алаңда мыңдаған тұрғын үнсіздікпен сап түзеді. Қолдарына шырақ ұстаған қала халқы майдан даласында қаза тапқан боздақтарды еске алып, жарық арқылы үміт пен жадыны жаңғыртты. Шамдардан жасалған бес бұрышты жұлдыз ерліктің символына айналса, дәл ортасына орнатылған “80” саны Жеңістің 80 жылдық даңқын бейнеледі.

Кеш соңында өскемендіктер мерекелік отшашуды тамашалады.

Қуаныш Рахметоллаұлы

Фото/видео: Жәнібек Ырысбай, Жалғас Сакадиев, Екатерина Семина