– Біз шекаралық аймақта орналасқан Зайсан, Тарбағатай, Күршім аудандарының тұрғындары облыс орталығынан шалғайда тұрамыз. Жұмысымыз болып, облыс орталығы – Өскеменге автобуспен барсақ, таңертең ерте автовокзал есігін ашпайды, амалсыз сыртта тосып отырамыз. Қазір күн суық, бала-шаға, үлкендер тоңып қалады. Себебі, қалада барайық десек үйіміз жоқ. Сұрағымыз, автовокзал жұмысын жолаушыларға қолайлы етіп неге ұйымдастырмайды? Осы мәселені шешіп берулеріңізді сұраймыз.

Тұрғындар атынан – Б.Тілекенов, Әбенов, Қайырбаев.

Зайсан ауданы.

Сауалға «ADAL» Өскемен автобекеті» жауапкершілігі шектеулі серіктестігінің директоры Алмас Бейсенғазин жауап береді:

– Хабарласқан оқырманның сауалына жауап берер болсақ, Өскемен автовокзалының жұмыс тәртібі таңғы сағат 6.00-ден кешкі 20.00-ге дейін анықталғанын және автобустар осы кезеңде келіп, кететіндігін хабарлаймыз.

Ал сағат 21.00-ден 6.00 аралығында түнде автовокзал ғимаратында және автобекет аумағында заңдылықты қадағалайтын кезекші қызметкерлер болады. Ағымдағы жазғы автобус кестесіне сәйкес Зайсан қаласынан автобус таңғы 4.00-де келеді.

Соған орай автовокзалдың кезекші қызметкерлері 2018 жылғы 26 шілдедегі №8 бұйрыққа сәйкес Зайсан ауданынан автобус келген кезде жолаушылар үшін автобекетті ашады. Аталған бұйрықпен автовокзал қызметкерлері толық танысқан.