15-25 тамыз күндері Аягөз ауданы әкімі Н.Нұрғалиев "Қонақ отбасы" бағдарламасы бойынша «Үміт» балалар үйінің 25 тәрбиеленушілерін 10 күнге қамқорлығына алады, деп хабарлайды Аltaynews.kz тілшісі.

Қонақ отбасы – жетімдерді орналастыру жолындағы аралық баспалдақ, кезең болып табылады.
Орналастырудың бұл түрі жетім балалар мен ата-анасының қамқорлығынсыз қалған балаларды жазғы демалыс кезінде отбасыларға уақытша тапсыруды көздейді.

Балалар үйінің тәрбиеленушілерін 15-тамызда «Үміт» балалар үйінен Аягөз ауданы әкімдігінің өкілдері 2 арнайы автобус көлігімен Аягөз қаласына әкетеді.

«Үміт» балалар үйі тарапынан салтанатты шығарып салу рәсімі өтеді.

Сол күні сағат 18.00-де Аягөз қаласының орталық алаңында қамқорлыққа алынған балаларды Аягөз ауданының әкімі салтанатты түрде қарсы алады.

Балалардың «Қонақ отбасында» болатын күндерінің іс-шаралар жоспары жасалған.

Ұлттық салт-дәстүрлеріміз бен мәдениетіміз тек ауылдарда ғана қаймағын бұзбастан сақталған. Сондықтан да балалар ауылда ұлтымыздың салт-дәстүр, әдет-ғұрыптарымен, ауыл тұрмысымен танысады. Демалыстарын тау басы, табиғат аясында өткізеді.

«Алыстан алты жасар бала келсе, ауылдағы алпыс жасар қария сәлем береді» демекші, үміттіктерді ауыл ақсақалдары, беделді азаматтар үйлеріне қонаққа шақырады.