Аягөз ауданында ата-анасының қамқорлығынсыз қалған балаларға қолдау көрсету мақсатында аудандық білім бөлімінің ұйымдастыруымен «Мейірім» қайырымдылық акциясы өтті, деп хабарлайды Altaynews.kz тілшісі.
Акцияға мектеп ұжымдары, ата-аналар, үлкен жүректі азаматтар мен кәсіпкерлер атсалысты. Арнайы жәрмеңке ұйымдастырылып, онда қолөнер бұйымдары, суретшілердің туындылары сатылымға қойылды.
Сондай-ақ, өз үлестерін қосам деген атымтай азаматтар да акциядан қалыс қалмады. Түскен қаражат аудандағы ата-анасыз 40 баланың арнайы есеп-шоттарына аударылды. Қорға 1 миллион 814 мың теңге жиналды.
Аудан көлемінде екінші рет өтіп отырған акцияға үлес қосқан азаматтарға облыстық білім басқармасының бастығы Мәдениет Ахметова ризашылығын білдіріп, марапат жасады.
