Тель-Авивтің екі тұрғыны көлік кептелісін ұтымды пайдаланып, табысқа кенеліп жатыр. Олар ірі магистральда кептелісте тұрған жүргізушілерге арнап дәмхана ашты.
Тель-Авив орталығынан жаңадан ашылған дәмхана атына заты сай «Кептеліс» деп аталады. Оларға жарнаманың қажеті жоқ. Адамдар өздері-ақ келеді. Дәмхана мегаполис орталығындағы ең ірі магистральдің бойында тұр.

– Мына жігіттердің дәмханасы бізге жақсы болды. Осы жерге жеткенше асығамын. Мұнда ыстық кофе ішіп, жеңіл-желпі тамақ жеп адам болып қаласың, – дейді жүргізуші Ави Гешер.
Дәмхана ашылған күннен-ақ иелерінде дамыл жоқ. Тапсырыс берушілер өте көп. Үнемі осы жолмен жұмыс-
қа баратындарды кәсіпкерлер танып та алған. Дәмхана-ның ас мәзірі де қарапайым: шәй, кофе, сэндвич және таңғы газеттер.
Тапқыр кәсіпкерлердің жуық арада жұмыссыз қалмайтыны анық. Өйткені тіршілігі қайнап жатқан Тель-Авивте көлік кептелісі көбеймесе азаймайды. Мұны ескерген олар кәсібін дамытып, қаланың өзге көшелерінен де дәл осындай дәмхана ашуды жоспарлап жүр.