Шығыс Қазақстан облысының Кәсіпкерлер палатасында өткен кәсіпкерлермен кездесуде Өскемен гарнизоны әскери прокуратурасының өкілдері өз қызметін гарнизонның әскери бөлімдері мен мекемелерінің аумағында жүзеге асыратын бизнес субъектілерінің құқықтарын қорғауға бағытталған шаралар туралы айтып берді.

Өскемен гарнизонының әскери прокуроры, әділет подполковнигі Есжан Сыбанбаев жиналғандарға кәсіпкерлікті дамыту жөніндегі 2021-2025 жылдарға арналған Ұлттық жобаның негізгі мақсаттары туралы, оның ішінде кәсіпкерлік құрылымында сапалы өзгерістерді қамтамасыз ету, халықты жұмыспен қамтуды арттыру мақсатында шағын және орта бизнесті дамыту, кәсіпкерлік субъектілері үшін тең жағдайлар жасау жөнінде сөз қозғады, деп хабарлайды Altaynews тілшісі.

 Прокурор Ұлттық ұлан желісі бойынша Мемлекеттік сатып алу туралы шарттарында тұрақсыздық айыбын заңсыз және дұрыс есептемеу фактілері анықталғанын айтты. Ол бұл жағдай шарттың орындалу мерзімі заңды күшіне енген күннен бастап емес, шарт жасалған күннен бастап қате есептелуіне байланысты қалыптасқанын түсіндірді.