Жастарға арналған шағын несие жасы 21 мен 35 аралығындағы, өтініш берген сәтте жеке кәсіпкер ретінде тіркелгеніне 5 жыл толмаған жас кәсіпкерлерді қолдауға бағытталған.

ШҚО-да жастар үшін 1 млрд 90 млн теңге сомасында 218 шағын несие қарастырылған, деп хабарлайды Altaynews тілшісі.

Айта кету керек, бағдарламаға жұмыс істейтін жастар да қатыса алады.

Жас кәсіпкерлер 5 миллион теңгеге дейінгі несиені мал шаруашылығы жобалары үшін 7 жылға дейін, кәсіптің басқа түрлері үшін 5 жылға дейінгі мерзіммен ала алады. Номиналды сыйақы мөлшерлемесі – жылдық 2,5 %.

Кепілзат ретінде арнайы техника, жылжымайтын мүлік және жер учаскелері қабылданады. Кепілге қоятын мүлік болмаса, кепіл берушіні (ата-анасы, туысы, т.б.) тартуға болады.

Жастар несиесіне өтініш пен құжаттарды «Аграрлық несие корпорациясы» АҚ Шығыс Қазақстан облысы бойынша филиалына тапсыру керек. Мекенжайы: Өскемен қаласы, Қабанбай батыр көшесі, 51.

Сонымен, қазір Аграрлық несие корпорациясының барлық облыс орталығы мен Астана, Алматы, Шымкент қалаларындағы филиалында жастар несиесіне өтініш қабылданып жатыр.