Әскери прокуратура профилактикалық жұмыс жүргізді – Өскемен
Өскемен гарнизонының әскери прокуроры 27943 әскери бөлімінде профилактикалық жұмыс жүргізіп, қызметкерлері және сарбаздармен әңгіме өрбітті, деп хабарлайды Altaynews тілшісі.
Әскери прокуратура – әскери тәртіптің сақталуын жіті қадағалайтын құзырлы орган. Ондағы қызметкерлер белгілі бір аумақта орналасқан әскери бөлімдер және мекемелермен тығыз қарым-қатынас орнатып, түрлі шаралар ұйымдастырады.
Бұл жолы Өскемен гарнизонының әскери прокуроры әрі әділет полковнигі Есжан Сыбанбаев әр сарбазбен және әскери қызметкермен жеке-жеке сұхбат құрып, жан-жақты тақырыпта әңгіме жүргізіп, түрлі сұрақтарға жауап берді.
«Мұндай профилактикалық жұмыстар әскер ішіндегі кем-кетікті айқындауға, түрлі құқық бұзушылықтар мен суицидтік әрекеттердің алдын алуға, сап түзеп жүрген сарбаздардың тыныс-тіршілігімен танысып, олардың психологиялық-моральдық жағдайларын анықтауға мүмкіндік береді», дейді Өскемен гарнизоны баспасөз қызметінің өкілдері.