Біз әуелгі заманнан бері әдет-ғұрып, салт-дәстүріміз табиғаттың тылсымымен тамырлас халықпыз. Бағзы заманнан бері күн мен түннің теңелуін көктемнің бастауы санағанбыз. Бұл күні самарқанның көк тасы жібіп, самарқаулы көңіл шуаққа бөленеді. Биыл да шығыста күн шытқыл болғанымен, жұрттың көңілі шуақты болды.  Орталық алаңға жиналған жұртты облыс әкімі құттықтап, көпшілікке арналған концерттік бағдарламалар мен ұлтттық ойындар өтті.

Орталық алаңды айнала ақшаңқан киіз үйлер тігілсе, жол жиегін жағалай сауда-саттық жаймалар орналасқан. Ал алаң ішінде бірі карокеде ән салса, бірі цирк көрсетіп жатыр. Енді біреулер қой көтеріп күш сынасса, балалар алтыбақан теуіп асыр салып жүр. Дәл осындай ойын-сауыққа толы алаңға кіріп кеткен адамның көңілі-күйі көтерілмеуі мүмкін емес. Сондықтан да болар алаңға жиналған жұрттың жүзі жадыраңқы, көңілі тоқ көрінді.

Осыдан кейін көпшіліктің көңілі ән мен күйге бөленді. Көпке танымал өнер жұлдыздары сахнада өнер көрсетіп, ұлттық мейрамның мәні мен сәнін келтірді. Ал киіз үйлерге жайылған көрмелерді тамашалаған жұрт өткен тарихтың тереңіне бойлап, салт-дәстүр, әдет-ғұрпымызды танып, көшпелі өмірдің өрнегіне көз жүгіртті. Тіпті заманауй технология тетігін де ұйымдастырушылар кәдеге жаратыпты. Республика алаңына ШҚТУ-дың тіккен ІТ киіз үйіне көпшілік VR-тур жасап, шығыстың шырайлы да, киелі жерлерін тамашалады. Осылайша жұрт онлайн болсада шығыстың жазиралы жасыл желек жамылған даласы мен киелі жерлеріне саяхат жасап қайтты. Ал бұдан өзге де киіз үйлерде көрінекі көрмелер мен ұлттық мұралар көпшілікке ұсынылған. Алаңның қай бұрышына барсаңда байырғы баба ғұрыптың өрнегі көзге шалынады. Сонымен қатар, әуелгі әдет бойынша көпшілікке тегін көже ұсынып тұрғандар да болды. Солардың бірі «Asarlike» атты бағдарлама негізінде жұмыс атқарып жүрген топ. Бұл компания наурызда көже таратқанымен, басқа уақытта «квартира таратумен» айналысады екен.

Көжеден дәм татқан соң жұртпен бірге  көше бойын жағалай қойылған сауда-саттық пен көрмелерді тамашаладық. Құрт пен май, айран мен сүт, қатық пен балдың түр-түрі тұр. Солардың арасынан бауырсақтың да түр-түрі бар екенін көріп біраз қызықтадық. Ең алдымен көзімізге «түйе бауырсақ» көрінді. Оның қасында «шай бауырсақ», «қалта бауырсақ», «ақ бауырсақ», «май бауырсақ», «жол бауырсақ» атты бауырсақтардың түрлері тұр. Бұның барлығы да тұрмыстң ыңғайына қарай пайда болғаны белгілі. Түйе бауырсақ той мен асқа, жол бауырсақ пен қалта бауырсақ жол жүргенге арналып дегендей. Қазақта бауырсақтың осынша түрі барын көбіміз біле бермейтініміз анық. Тіпті, ірімшіктің 100 түрі бар дегенді де естіген болатынбыз. Осыған қарап-ақ қазақ тағамының түрі көп, дастарқаны бай болғанын бағамдауға болатындай. Ал бай дастарқанын жұрт наурызда жайып, арқа-жарқа қауышып жатады. Бұл үрдіс биыл да жалғасып, жаманшылық пен жұттан ада жұрт жадыраңқы күйде наурыз дастарқанының басында жолығысты. 

«Бақыт» бұлағының көзін ашты

 Тіршіліктің көзі саналатын от пен суға деген құрметіміз қай уақытта да жойылмайтыны анық. Су иесі Сүлейменнен сақтанып ағынды суды түнде оятпау о заманнан ғұрпымызда бар. Ал отпан тауда от жағу үрдісі күні бүгінгі дейін батыс өңірде жалғасып келеді. Осындай табиғатпен тамырлас дәстүрлердің бірі – бұлақ көзін ашу. Көктем келісімен бұлақ көзін ашып, маңайға тазалық жүргізу көшпелі салтымыздан бар әдет. Осы бір үрдісті Өскемен қаласына қарасты №20 шағын ауданның тұрғындары жаңғартты. Бұл аумақта алғашқыда 6-7 бұлақ болса, қазір содан біреуі ғана қалған. Бұлақ көзі тартылып қалмаса екен деген тұрғындар наурыз мейрамына орай бұлақ маңына тазалық жүргізіп, соңын мерекелік шарамен жалғастырған.

Ал мерекелік шараға жиналған жастар садақ атып жарысып, гір көтеріп күш сынасты. Осылайша шағын аудан тұрғындары бұлақ көзін ашып, өсіп келе жатқан ұрпаққа табиғатпен тамырлас екендіктерін көрсетті. Бұл да өскін ұрпақ үшін өнегелі істің бірі болды. Ал табиғатпен тіндес жұрт бұлақтың сылдырына құлақ түріп көктемнің келгенін сезініп қайтты.