Өскемендегі Достық үйінде жаңа Конституциясы жобасын талқылауға арналған облыстық ардагерлер ұйымы және ақсақалдар кеңесінің біріккен жиыны өтті. Оған Риддер қаласы мен Алтай, Күршім, Тарбағатай, Зайсан және басқа да аудандардағы ардагерлер ұйымы мен ақсақалдар алқасының төрағалары онлайн режимінде қатысты, деп хабарлайды Altainews.kz тілшісі.

Жиынды тізгіндеген облыстық ардагерлер ұйымының төрағасы Айтқазы Шерубаев қоғам талқысына ұсынылып отырған жаңа Конституция жобасының маңыздылығына, аталмыш заң жобасының уақыт талабына сай екендігіне тоқталды.

Сөз алғандар Мемлекет басшысы Қасым-Жомарт Тоқаевтың бастамасымен еліміздің Ата заңына енгізіліп жатқан толықтырулар мен түзетулердің қоғамда алатын орнының аса маңыздылығы мен дер кезінде қолға алынған бастама екендігіне тоқталды.

Жиын барысында сөз алған Нәбиолда Кемешов, Сағынбек Ақанов, Болат Сағымбайұлы, Сабыр Оспанов, Аман Қасенов сынды ел ақсақалдары қоғамда тіл мәселесін саясиландырудың қажеті жоқ екендігін, көпұлтты мемлекетіміздің ауызбіршілігін сақтау керектігін, Ата заң жобасының 9-бабының І бөлімінде «Қазақстан Республикасының мемлекеттік тілі – қазақ тілі» деп тайға таңба басқандай анық көрсетілгендігін атап өтіп, елді Конституцияның жобасына байыппен, байсалдылықпен қарау керектігін ортаға салды.

Алқалы жиын соңында Айтқазы Сейітұлы Ата заңымыздың жаңа жобасын қолдайтын арнайы штаб құруды ұсынып, ақсақалдар бұл бастаманы бірауыздан мақұлдады.