Ауыл – елдің алтын діңгегі. Сол діңгектің берік болуы, ең алдымен, халықтың денсаулығына тікелей байланысты. Осы тұрғыда Шығыс Қазақстан облысы, Ұлан ауданына қарасты Тройницкое ауылында жаңа медициналық пункт салтанатты түрде ашылды, деп хабарлайды Altainews.kz тілшісі. 

Жалпы ауданы 154,7 шаршы метрді құрайтын заманауи талаптарға сай салынған медициналық пункт ауыл тұрғындарының денсаулығын қорғауға бағытталған маңызды әлеуметтік нысанға айналып отыр.

Ашылу салтанатында сөз алған Ұлан ауданының әкімі Арман Бекбосынов бүгінгі таңда қазақстандықтардың денсаулығын жақсарту мемлекеттк саясаттың бас бағыттарының бірі екенін атап өтті. 

Аудан әкімі жаңа медициналық пунктің іске қосылуы ауыл тұрғындары үшін сапалы әрі қолжетімді медициналық көмек алуға жол ашатынын жеткізді. Сонымен қатар денсаулық сақтау инфрақұрылымын жаңғырту Мемлекет басшысының тапсырмалары аясында кезең-кезеңімен жүзеге асып жатқанын айтып, жаңа нысан ауыл халқының игілігіне ұзақ жылдар қызмет ететініне сенім білдірді.

Нысан қажетті медициналық жабдықтармен толық қамтамасыз етілген. Мұнда 12 арналы электрокардиограф, дефибриллятор, магнитотерапия аппараты, инфузиялық сорғылар, компрессиялық небулайзер, спирометр, бактерицидті сәулелендіргіштер және өзге де заманауи құрал-жабдықтар орнатылған. Барлық жағдай ауыл тұрғындарының денсаулығын сақтауға және аурудың алдын алуға бағытталған.

Тройницкое ауылында 127 адам тұрады. Оның ішінде 20 бала мен 26 репродуктивті жастағы әйел бар. Енді ауыл тұрғындары үшін медициналық көмек бұрынғыдан да қолжетімді болып, денсаулыққа қатысты мәселелерді дер кезінде шешуге мүмкіндік туып отыр.

Ауыл тұрғындары да жаңа медициналық пункттің ашылуын үлкен қуанышпен қабылдады. Көптен күткен нысанның іске қосылуы жергілікті халық үшін маңызды оқиғаға айналды.

Ауылдық жерлерде денсаулық сақтау инфрақұрылымын дамыту – мемлекет саясатының басым бағыттарының бірі. Тройницкое ауылында ашылған жаңа медициналық пункт – осы жүйелі жұмыстың нақты нәтижесі.

Жайна Сыранова
Фото/видео: Жәнібек Ырысбай