Шығыс Қазақстан облыстық драма театры 11 желтоқсан күні, сағат 16:00-де Тәуелсіздіктің 30 жылдығына арналған Қ. Ысқақ, Ш. Құсайыновтың «Қазақтар» тарихи драмасын көрермен назарына ұсынады. Бұл туралы мекеменің баспасөз қызметі хабарлады.
Қойылымның режиссері - Қазақстанның халық артисі, мемлекеттік сыйлықтың лауреаты, Қазақстан театр қайраткерлері одағының төрағасы Тұңғышбай Қадырұлы Жаманқұлов.
Он бесінші ғасырдың екінші жартысында «Алтын Орда» төрт мемлекетке бөлінді. Соның бір бөлігі Әбілхайыр ханның билігінде қалып, Алтын Орданың соңғы ханы Өзбектің құрметіне Өзбек-қазақтар деп аталған еді. 1450 жылы Әбілхайырдан бөлініп шыққан Жәнібек пен Керей бастаған өзбек-қазақтар 1457 жылы қазақтың тәуелсіз мемлекетін жариялады. Шу бойына табан тіреген қазақ мемлекеті ендігі жерде хандықты қалай сақтап қалмақ. Қорған болар нуы, арқа сүйер бекінісі жоқ қу далада ел болып хандық құру қауіпті екені белгілі. Әбілхайырдың немересі Мұхаммадтың ұсынысын қабыл алып, қайтадан сол өзбек хандығының қолтығының астына кіруі керек пе? Әлде тәуекелге бел байлап артынан ерген елге ие болып мемлекетті сақтап қалған дұрыс па? Шайбанидың көздегені хандық болса, Қасым сұлтан оған қалай тосқауыл қойғаны жөн? Қасым әкесі Жәнібек пен Керей бастап кеткен жолды қалай жалғамақ? Бұл сұрақтарға көрермен сахнадан жауап табары анық.  

Өтетін күні: 11 желтоқсан, сағ: 16:00
Өтетін жері: Өскемен қаласы, Қ.Сәтбаев даңғылы, 55
Анықтама тел: 8(7132) 71-00-79, 8/778/459-27-57, 8/771/568-38-95