ШҚО мемлекеттік қызмет істері жөніндегі департаменттің жанындағы Әдеп жөніндегі кеңестің отырысында өткен жылы барлығы 70 тәртіптік іс қаралса, заңнан аттаған кейбір шенеуніктердің қызметінен өз еркімен кетуіне орай, оларға қатысты 7 іс қысқарып қалған, деп хабарлайды Altaynews.kz тілшісі.

Тоқтатылған тәртіптік істердің бірі Көлік комитеті арқылы түскен Шығыс Қазақстан көлік прокуратурасының  ұсынымының негізінде қозғалған. Прокуратураның актісінде  ШҚО бойынша көліктік бакылау инспекциясы басшылығының іс-әрекеттерінде ҚР «Мемлекеттік қызмет туралы» Заңының  50-бабында көрсетілген мемлекеттік қызметке кір келтіретін тәртіптік теріс қылықтар бар екені жазылған. Шығыс Қазақстан көлік прокуратурасының  2023 жылғы 20-қазандағы ұсынымының негізінде  2023 жылдың 13-желтоқсанында Әдеп жөніндегі кеңес төрағасының бұйрығымен тәртіптік іс қозғалады.

Бұдан басқа, 2022-2023 жылдары айыппұлдарды төмендету, жұмысты тиісінше ұйымдастырмау және испекция тарапынан бақылаудың жеткіліксіздігі сияқты заңбұзушылықтар орын алған.

Қысқасы, бұл жақта Әдеп кеңесі тәртіптік іс қозғап, шенеунікті жөнге саламыз дегенше, ШҚО бойынша көліктік бақылау инспекциясының басшысы Асхат Ешимов 2023 жылғы 1-желтоқсанда Көлік министрлігі аппарат басшысының бұйрығымен (№118-к) Солтүстік Қазақстан облысы бойынша көліктік бақылау инспекциясының басшысы лауазымына тағайындалғаны белгілі болды.

Жиында былтыр Әдеп кеңесінің тоғыз отырысы өткені, онда барлығы 71 іс қаралғаны, олардың 23-і тәртіптік іс екені  айтылды. Қызығы сол, заңнан аттаған шенеуніктердің қызметтерінен өз еріктерімен кетуіне орай, 23 істің 7-уі тоқтатылған.

Әділеттілік үшін айтайық,  Әдеп жөніндегі кеңестің төрағасы Көлік министрлігінің аппарат басшысына тәртіптік іс қозғалуына байланысты инспекция басшысы А.Ешимовтың өз еркімен мемлекеттік қызметті тоқтатуына жол бермеу жөнінде 8-желтоқсанда жазбаша ескерткен. Алайда бұл уақытта А.Ешимбаев бір аптадай басқа облыстың көлікті бақылау инспекциясының басшысы болып отырған.

Дегенмен Әдеп жөніндегі кеңес хатшылығының меңгерушісі Қайрат Сапарғалиев осы тұрғыда заңнамада өзгерістер болуы мүмкін екенін жеткізді.