Көкжота ауылы тұрғынының қорадағы малына шапқан жыртқыш қасқырлар болып шықты. Екі күн бұрын түз тағыларын тікұшақпен іздеп шыққан орман және аңшылық шаруашылығының жедел жасағы Қараөткел жақтағы құмды шағылдан төрт қасқырды атып өлтірген, деп хабарлайды Altaynews.kz тілшісі.

Самар ауданындағы Бастаушы ауылдық округінің Көкжота ауылында 20 қаңтар күні түнде белгісіз жыртқыш ауыл тұрғыны Еділхан Сарбасовтың қорасындағы малға шауып, таңертең 15 бас қой өлі табылған. Жыртқыш тағы да 15 қойды жаралап, жайратып, қаңсыратып кеткен. Мал иесі Еділхан Сарбасовқа телефонмен хабарласқанымызда, қазір қолында жеті қой ғана қалғанын айтады. Қозылы қойлары өзге жылы қорада тұрып, аман қалыпты. Қасқыр қырып кеткен 30 басының 20-дан астамы қозылағалы тұрған буаз қойлар болған екен. «Жергілікті әкімдіктегілер малды ит талап кетсе немесе басқадай жағдайдан өлсе ғана шығынды өтеп беретінін айтты. Қыстайғы осы мал деп жинаған шөбім сол күйі қалды. Қолымызды қусырып қалдық қой» дейді.

Оқыс оқиғадан кейін жергілікті билік орман шаруашылығы қызметкерлеріне жыртқыштарды бақылауды күшейтуді тапсырған болатын.

24 қаңтар күні Құлынжон қорығының мемлекеттік инспекторы Нұрхат Беркімбаевтың жол көрсетуімен көкке көтерілген тікұшақтағы орман және аңшылық шаруашылығының жедел жасағы Көкжота ауылының арғы тұсындағы Қараөткел жақтағы құмды шағылдан төрт бірдей қасқырды атып өлтірген. Жергілікті аңшылық шаруашылығының иесі Александр Федосовтың айтуынша, малға шапқан қасқырлар осылар болуы мүмкін.

Нұрхат Беркімбаевтың бізге телефонмен баяндап айтқанындай, 46 мың гектарға жуық жерді алып жатқан Құлынжон қорығындағы шағылдарда еліктер көп жүреді. Сілеусіндер де кездеседі. Шағыл құмдарда қар жамылғысы жұқа болғандықтан бұл өңір қыста тұяқтылардың жайылуына ығайлы. Сол себепті ол жақта түз тағылары, үйірімен жүретін қасқырлар да көп.

Шығыс Қазақстан облыстық орман шаруашылығы және жануарлар дүниесі аумақтық инспекциясының мамандары берген мәлімет бойынша, бүгінде облыста шамамен 1741 қасқыр, 1261 сілеусін бар көрінеді. Бұл біздің өңір үшін көп пе, аз ба, бәлен деп айта алмаймыз. Айтарымыз: облыс аудандарындағы мал шаруашылығы иелерінің қасқырдың өрістегі малға шауып, тыныштықты алып тұрғанын жиі айтып, хабарлап жүргені. Мұны мемлекеттік инспектор Нұрхат та растады. «Кеше ғана Күршім ауданындағы Қайыңды ауылындағы шаруашылық иесі жылқыларына қасқыр шауып жатқанын айтып, хабарласты», дейді ол.

 Фото: Еділхан Сарбасов және Жалын Мұратұлынікі 

Жанаргүл Мұқатай