Тарбағатай ауданында қайтарымсыз грант арқылы өз ісін өркендетіп жатқандар баршылық.

Солардың бірі Ақжар ауылының тұрғыны Әсел Бөкенова «Атамекен» кәсіпкерлер палатасының «Бастау бизнес» жобасы бойынша оқып, сертификат алып, 1 млн 380 мың теңге грантқа ие болды. Бүгінде ол аталған қаражатқа Ақжар ауылынан пескоблок құюға қажетті құрал-жабдықтарын сатып алып, кәсібін жүргізіп отыр, деп хабарлайды Altaynews тілшісі.

Бәсекелестік артқан заманда қатарынан қалмай, тынымсыз еткен еңбегі босқа кеткен жоқ. Қазір түрлі тапсырыстар қабылдап, ісін алға бастыруда.

Жалпы, ауданда 2022 жылы Кәсіпкерлікті дамытудың 2021-2025 жылдарға арналған ұлттық жобасымен 88 азамат қоғамдық жұмыс[1]тарға жолданса, 37 азамат жеті түрлі мамандық бойынша қысқа мерзімді кәсіптік оқу оқып, мамандық алған. Оның 20-сы тұрақты және уақытша жұмысқа орналастырылған. 28 үміткер «Бастау бизнес» жобасы бойынша оқып, жаңа бизнес идеяларға арналған қайтарымсыз грант қаражатын алған. Жоғары оқу орнын аяқтап келген үш жас маман жастар іс-тәжірибесіне, бір жас маман алғашқы жұмыс орындары жобасымен жолданған.

Биыл аудан бойынша комиссия шешімімен тоғыз адамға 1 млн 380 мың теңгенің қайтарымсыз гранты, жастардың кәсіпкерлік бастамаларына жәрдемдесу мақсатында 30-ға тарта адамға 2,5% мөлшерлемемен шағын несие, 100-ден астам адамға ауыл шаруашылығы мақсатындағы 2,5%-дық несие беру көзделген.

Ерлан Бапанов