Семейде тағы бір ғылыми-тәжірибелік конференция басталды
Шығыс Қазақстан облысының тілдерді дамыту жөніндегі басқармасының ұйымдастыруымен 2019 жылғы 15 қарашада Семей қаласында «Үш бәйтерек: тағдыр мен тағылым» тақырыбында облыстық ғылыми-тәжірибелік конференция басталды, деп хабарлайды Алтайньюс тілшісі.
Алаш қайраткерлері С. Сейфуллин, І. Жансүгіров және Б. Майлиннің 125 жылдығына арналған шараның мақсаты - қазақтың «үш бәйтерегі» атанған қайраткерлердің тағылымын, қазақ әдебиетін дамытудағы еңбектерінің ерекшелігін көпшілікке таныту және латыннегізді жаңа әліпбидің маңызын түсіндіру.
Ғылыми-практикалық конференцияға ғалымдар, зиялы қауым өкілдері, мемлекеттік органдар мен мекемелер қызметкерлері, студент жастар, қоғамдық ұйымдар мен бұқаралық ақпарат құралдарының өкілдері қатысып жатыр.
Ғылыми-практикалық конференцияның пленарлық мәжілісінде қазақ әдебиетіндегі алаш идеясы, үш бәйтеректің тұлға ретінде қалыптасуы және шығармалары тілінің әдеби-теориялық негіздері талқыланса, секциялық отырыстарда латыннегізді жаңа әліпбидің маңыздылығы төңірегінде сөз қозғалады.
Пленарлық мәжілістен соң конференцияға қатысушылар «Үш бәйтерек-үш ғұмыр», «Ұлт руханияты және жаңа қазақ әліпби» атты екі секцияға бөлініп жұмыс істейді.