Оқу-ағарту министрлігінің техникалық және кәсіптік білім департаменті сұранысқа ие мамандықтардың рейтингін жасады.

Жалпы, биыл мемлекеттік білім беру тапсырысы бойынша 130 мыңнан астам талапкерді қабылдау жоспарланған. Оның ішінде кәсіпорындардың өтінімдері бойынша 10 мың студент бар, деп хабарлайды Altaynews тілшісі.

Қазіргі уақытта еңбек нарығында мына бағыттар сұранысқа ие:

• ақпараттық технологиялар;
• құрылыс және коммуналдық шаруашылық;
• геология;
• тау-кен өнеркәсібі;
• энергетика;
• металлургия және машина жасау;
• көлік;
• байланыс;
• педагогика;
• медицина және т.б.

«Еліміздің колледждерінде барлығы 517 мың студент оқиды, оның ішінде 312 мыңы тегін техникалық және кәсіптік біліммен қамтылған. Биыл мемлекеттік білім беру тапсырысы 50 мың орынға артады. Сонымен қатар жаңа оқу жылынан бастап колледж студенттерінің стипендиясы 50%-ға көбейеді», - деп жазды министрлік.

Мемлекеттік тапсырыс бойынша білім алатын студенттер әлеуметтік қолдаумен қамтылады. Бұған стипендия, тамақ және жолақы кіреді.