Өскемендегі арнайы пунктерге екі тоннаға жуық көмек жиналды
Еліміздің су басқан облыстарының тұрғындарына қайырымдылық көмегін жөнелту үшін Өскемен қаласында ресми екі қабылдау пункті ашылғаны белгілі. Осы жерлерге қарапайым халықтан, көп балалы аналардан әлі күнге азық-түлік пен күнделікті қажет заттар келіп жатыр.
Бүгінде екі тоннаға жуық азық-түлік пен басқа да керекті заттар жиналды, деп хабарлайды Altainews.kz тілшісі.
Ұйымдастырушылардың сөзіне қарағанда, еріктілер фронт офисімен Сәрсен Аманжолов атындағы ШҚУ мен Қазақстан-Американ еркін университеті тығыз байланыс орнатқан. ШҚУ ұжымы азық-түлік және жуынатын заттар әкелсе, ҚАЕУ қызметкерлері тамақ өнімдерімен қоса төсек орын, матрастармен көмектесіпті. Азық-түлік өнімдері зауытынан бес тонна ұн жеткізіледі деп күтілуде.
Ел басына туған ауыр күндер ешкімді де бейжай қалтырмай, қала тұрғындары да шама-шарқыларынша көмек қолын созуда. «Кедей - жомарт» демекші, бұл акциядан көп балалы аналар да тыс қалған жоқ.
Естеріңізге сала кетейік, қабылдау пункттері : еріктілер фронт офисі -Горький, 48 және ШҚО Қазақстан халқы ассамблеясы жанында, -Достық үйінде, Назарбаев, 68 мекенжайында орналасқан.