ШҚО-да сотталып шыққандарды жұмысқа алып жатыр
ШҚО-да пробация есебіндегі 10-нан астам сотталған азамат жұмысқа тұруға мүмкіндік алды.
Облыс орталығында пробация қызметінің есебінде тұрған бас бостандығынан айыру орындарынан босатылған азаматтарға арналған жалпы қалалық бос орындар жәрмеңкесі өтті, деп хабарлайды Altaynews.kz сайты Polisia.kz ақпараттық порталына сілтеме жасап.
Жалпықалалық жұмыспен қамту жәрмеңкесі – бүкіл облыс бойынша жұмыс берушілерді және жұмыс іздеп жүргендерді біріктіретін ауқымды шара. Шараның ұйымдастырушылары – жергілікті атқарушы орган мен Өскемен қаласы халықты жұмыспен қамту орталығы.
Жәрмеңке жұмысына 20-дан астам жұмыс беруші қатысып, 150-ден астам бос жұмыс орнын ұсынды.
Көптеген ұйымдарға жүргізушілер, дәнекерлеушілер, слесарьлар, тамақтандыру саласы бойынша қызметкерлер қажет. Медициналық мамандар да сұранысқа ие.
Айта кетсек, жәрмеңке соңында пробация қызметінде есепте тұрған 10-нан астам адам жұмысқа орналасу үшін жолдама алды.