Өскеменде өтіп жатқан халықаралық «Altay Invest-2025» инвестициялық форумында Шығыс Қазақстан облысының әкімі Нұрымбет Сақтағанов өңірдің 2030 жылға дейінгі экономикалық бағытын таныстырды. Басымдық – экономиканы екі есеге ұлғайту, инвестицияларды жеделдету, бюджет кірісін күшейту және халықтың тұрмыс сапасын арттыру. Бұл мақсаттарға газдандыру, жаңа жұмыс орындарын ашу және шекаралық аймақтарды дамыту арқылы қол жеткізілмек, деп хабарлайды Altainews.kz.

Әкімнің айтуынша, облыс жаңа өсу кезеңіне қадам басып отыр. Бұл кезеңде басты назар – инвесторлар үшін ашық әрі түсінікті ережелер қалыптастыруға және олардың жобаларын сүйемелдеуге бағытталмақ. Жоспарланған мақсаттар макроэкономикамен қатар, шығысқазақстандықтардың өмір сапасын жақсартуға да тікелей қатысты.

Аймақ басшысы үшін басты құндылық – адам және аумақ.

Форум қатысушыларымен – инвесторлар, кәсіпкерлер және сарапшылармен пікір алмасу барысында әкім өңірдегі қолдау құралдарын және ынтымақтастық форматын түсіндірді.

Әкімнің айтуынша, бұл бастамалар тұрғындар үшін – жаңа жұмыс орындары, ауылдардың газдандырылуы және шекаралық аймақтардың дамуы болса, бизнес үшін – тұрақты ережелер, салықтық жеңілдіктер және жобаларды сүйемелдеу жүйесі. Ал жалпы мақсаттар – жалпы өңірлік өнімді, инвестицияларды және бюджет кірісін арттыру – инфрақұрылымдық шешімдермен және кадрларды даярлаумен бірге іске асқанда өңір экономикасына қуатты серпін береді.

Дамир Омаров
Фото: Жібек Нұрахмет

Видео: Евгений Щетников