Өткен жылы облыстың денсаулық сақтау саласына 26 млрд теңге бөлінді. Соның ішінде 3,3 млрд теңгеге медициналық жабдық сатып алынса, 15,7 млрд теңгеге медициналық нысандар салынды. Ал мамандарды оқытуға 0,7 млрд теңге қаражат жұмсалды.
Бұл туралы ШҚО әкімі Даниал Ахметов айтты, деп хабарлайды Altaynews тілшісі.

Аймақ басшысының айтуынша, аудандық ауруханаларға 3 млрд теңге бөлінеді. Сондай-ақ облыс орталығында бірегей гематология орталығының құрылысы жалғасып жатыр. Ал Риддер қаласында 140 төсектік стационары бар аурухана кешенінің және бір ауысымда 500 адам қабылдай алатын емхананың құрылысы басталды. Ұлан ауданының орталығы Қасым Қайсенов кентінде 150 адам қабылдайтын емхана салу мәселесі шешілгенін бұған дейін де хабарладық. Жалпы, өңірде ауылдық денсаулық сақтауды жаңғырту шеңберінде 7,9 млрд теңгеге 36 медициналық нысан салу жоспарланған.
Бұдан бөлек, онкологиялық ауруларды ерте диагностикалау мақсатында облыстық көпсалалы онкология және хирургия орталығының ғимаратын жаңартып, ПЭТ-КТ орнату облыс басшылығының жоспарында бар.