Глубокое ауданының жастар ресурстық орталығы «Ұлы Абай» атты онлайн байқау жариялады, деп хабарлайды Алтайньюс тілшісі.

Байқауға қатысу үшін MP4 форматында, ұзақтығы 1 минут 50 секундтан аспайтын бейнежазба дайындау қажет. Қатысушылар бейнежазбада ақынның өлеңдерін немесе қара сөздерін мәнерлеп оқуы тиіс. Сондай-ақ Абай әндерін шырқауға да болады.
Көпшілікке мәлім, 2020 жылы қазақтың ұлы ақыны, ойшылы, композитор, қоғам қайраткері, қазақ жазба әдебиетінің негізін қалаушы және бірегей классигі Абай Құнанбайұлының туғанына 175 жыл толады. Мемлекет Басшысы Қасым-Жомарт Тоқаев айтқандай, «біз тарихтан тағылым алып, ата-баба рухын құрмет тұтқан халықпыз. Ұлы Абайдың мұрасы «Рухани жаңғырудың» маңызды бағыты болуы тиіс». Сондықтан біздің міндетіміз – ұлы ақынның шығармаларын аудан жастары арасында кеңінен насихаттау, – дейді орталық директоры Гүлмира Ордаханова.

Байқауға ұсынылатын жұмыстар Instagram әлеуметтік желісінде 20 мамырға дейін қабылданады. Қатысушылар бейнежазбаны өз парақшаларында жариялап, @jastar_glubokoe аккаунтын белгілеуі қажет. Жеңімпазға Глубокое ауданының Жастар ресурстық орталығының арнаулы жүлдесі табысталады.