Бүгін Мемлекет басшысы Қасым-Жомарт Тоқаев жұмыс сапарымен Шығыс Қазақстан облысында болды.

Сапар аясында ол өңірдің денсаулық сақтау, металлургия, ауыл шаруашылығы, білім, спорт және басқа да салаларында атқарылып жатқан жұмыстармен танысты, деп хабарлайды Altainews.kz сайты.

Еліміздегі іргелі кәсіпорындардың бірі Өскемен титан-магний комбинатын аралап, Сәулелік терапия және диагностика орталығының, «Лу Бань шеберханасының» жұмысын көрді. Сондай-ақ Мемлекет басшысы облыс орталығындағы элиталық тұқым шаруашылығын дамытып отырған «Майлы дақылдардың тәжірибелік шаруашылығы» ЖШС-да, «Шығыс-Сүт» корпорациясының өндіріс алаңында болды.

Өскемендегі заманауи спорт кешендерінің қатарынан саланатын Ольга Рыпакова атындағы жеңіл атлетика орталығы мен Үстел теннисі орталығын аралап, сол жерде «Үміт» балалар үйінің тәрбиеленушілерімен сөйлескен Президент жас спортшыларға арнайы автобус сыйлады.