Бүгін Сенаттың жалпы отырысында «Қазақстан Республикасының кейбір заңнамалық актілеріне сұйытылған газ айналымын реттеу және тұрғын үй-коммуналдық шаруашылық мәселелері бойынша өзгерістер мен толықтырулар енгізу туралы» Заңы екі оқылымда қаралып, мақұлданды.

Сенатор Сүйіндік Алдашев кейінгі кезде сұйытылған мұнай газына деген ішкі сұранысты қамтамасыз ету мәселесі өзекті екенін мәлімдеді, деп хабарлайды Altaynews Қазақпарат агенттігіне сілтеме жасап.

Сонымен қатар ол өнімді жеткізу жоспары аясында сұйытылған мұнай газын бөлу тетігі өзгеретінін айтты. Бұл тұрғыда Энергетика министрлігі тиісті ақпараттық жүйе арқылы өзі айқындайтын тәртіппен жеткізу жоспарын қалыптастырады. Ал жергілікті атқарушы органдар Энергетика министрлігі айқындайтын тәртіппен жеткізу жоспары бойынша бөлінген сұйытылған газ көлемін бөлуді бекітеді. Сұйытылған мұнай газын өндірушілер мен меншік иелері сұйытылған газдың жеткізу жоспарын орындауға және бөлінген көлемін таратуға міндетті. Жеткізу жоспары аясында өткізілетін сұйытылған мұнай газын сатып алу құқығы газ толтыру станциялары мен пункттерінің, топтық резервуарлық қондырғылардың, автогаз құю станцияларының иелерінде, сондай-ақ өнеркәсіптік тұтынушыларда болады.

Бұдан бөлек ол тұрмыстық баллондарды пайдалану кезінде қауіпсіздікті қамтамасыз ету мақсатында оларға газ құю тек газ толтыру станциялары мен пункттерінде рұқсат етілетінін айтты.

Өз кезегінде Сенат төрағасы Мәулен Әшімбаев заң газ және газбен жабдықтау саласында туындаған қоғамдық қатынастарды қосымша реттеу үшін әзірленгенін айтты.