Биыл КСРО Халық мұғалімі, тарихта аты аңызға айналған Құмаш Нұрғалиевтің туғанына 100 жыл толады. Осы атаулы күнге орай Өскемен қаласындағы Абай атындағы Шығыс Қазақстан гуманитарлық колледжінде «Құмаш Нұрғалиев – Халық ұстазы» атты республикалық ғылыми-тәжірибелік конференция өтті, деп хабарлайды Altainews.kz тілшісі.

Облыстық білім басқармасы, Кәсіптік білім беру орталығы және Абай атындағы Шығыс Қазақстан гуманитарлық колледжінің жанындағы республикалық «Білім беру» бейіні бойынша оқу-әдістемелік бірлестігі ұйымдастырған шараға техникалық және кәсіптік білім беру ұйымдарының оқытушылары қатысты.

Педагогтардың ғылыми-зерттеу жұмыстарын дамыту, инновациялық тәсілдер бойынша тәжірибе алмасу мақсатында ұйымдастырылған конференция тек білім саласындағы бірегей тұлғаның еңбегін ұлықтау ғана емес, сонымен қатар педагогика саласының маңызды мәселелерін талқылауға арналған алаң болды.

«Ұстаз Құмаш Нұрғалиевтің өмірінің өзі – ерлік. Оның өмірі мен қызметі өз ісіне, халқына, педагогикаға қызмет етудің жарқын үлгісі болды. Идеялары мен еңбегі әлі де шабыттандырып, жас ұрпақ үшін бағдар ретінде қызмет етіп келеді. Бұл шара Құмаш Нұрғалиұлын еске алып, педагогика саласына қосқан үлесін атап өтуге тамаша мүмкіндік», – деді облыстық білім басқармасы басшысының орынбасары Алима Ақылбекқызы.

Шарада Нұрғалиевтер педагогикалық әулетінің өкілі, ұстаздың қызы, педагогика ғылымдарының докторы, профессор Гүл Құмашқызы және Абай атындағы Шығыс Қазақстан гуманитарлық колледжінің директоры Фархад Құрманов ұстаздың өнегелі өмірі мен еңбегі жайлы мазмұнды баяндама жасап, қызы әкесі жайлы жылы естеліктерімен бөлісті.

Айта кетейік, ұстаз 31 жыл бойы Марқакөл ауданы Боран ауылында мектепті басқарды. 1989 жылы мектепке «Халық мұғалімі Құмаш Нұрғалиевтің мектеп-гимназиясы» атағы берілді.

Өскемен қаласының №43 мектеп-лицейіне Құмаш Нұрғалиевтің есімі берілді. Сонымен қатар, Құмаш Нұрғалиев атындағы Жоғары колледж бүгінде түрлі бағыттар бойынша мамандар даярлауда.

Конференцияның жұмысы «Қ. Нұрғалиевтің педагогикалық идеялары мен мұралары», «Білім берудегі инновациялық ізденістер: цифрлық технология мүмкіндіктері» және «Ұлттық құндылықтар – тәрбие негізі» бағыттары бойынша жалғасты.

Конференция аясында барлығы 200 баяндама ұсынылды. Оның ішінде 42 оқытушының шығармашылық жұмысы іріктеуден өтті. Шара соңында үздік баяндама ұсынғандар І, ІІ, ІІІ дәрежелі дипломдармен марапатталды.

Айжанат Бақытқызы

Фото: Жәнібек Ырысбай