Баланың денсаулығына қамқорлық алғашқы емханаға барудан бұрын басталады. Аурудың алдын алудағы ең негізгі әрі тиімді шаралардың бірі – уақтылы және ғылыми негізделген вакцинация, деп хабарлайды Altainews.kz тілшісі ҚР Денсаулық сақтау министрлігінің баспасөз қызметіне сілтеме жасап.

Өмірдің алғашқы жылдарында баланың ағзасы түрлі инфекцияларға аса осал келеді. Ересектер үшін жеңіл өтуі мүмкін кейбір аурулар нәрестелерде ауыр асқынуларға, соның ішінде жүйке жүйесінің зақымдануына, мүгедектікке немесе тіпті өлімге әкелуі мүмкін. Қызылша, көкжөтел, сіреспе, полиомиелит секілді жұқпалы аурулар әсіресе сәбилер үшін үлкен қауіп төндіреді.

Қазіргі екпе медициналық қоғамдастықта вакциналардың тиімділігі мен қауіпсіздігін дәлелдейтін нақты ғылыми деректер жеткілікті. Вакцинацияның арқасында көптеген қауіпті инфекциялардың таралуы айтарлықтай азайып, кейбір аурулар мүлде жойылды. Бұрын бұл дерттер балалар өлімінің негізгі себептерінің бірі болып, өмір бойына созылатын ауыр салдарға әкелетін.

Дүниежүзілік денсаулық сақтау ұйымының мәліметіне сәйкес, вакцинация жыл сайын 3-5 миллион адамның өмірін сақтап қалып, денсаулық сақтаудың ең сенімді құралдарының бірі болып отыр.

Барлық вакциналар көпсатылы сапа бақылауынан өтеді. Өндіріс кезеңінен бастап медициналық тәжірибеде қолдануға дейін әрбір кезең қатаң тексеріледі.

Соңғы 30 жылда балаларды иммундау бойынша жүргізілген тиімді ұлттық саясаттың нәтижесінде эпидемиялық паротитпен сырқаттану 100 еседен астам, А вирустық гепатитімен – 32 еседен астам, В вирустық гепатитімен – 92 есе, ал қызылша мен қызамық бойынша көрсеткіштер 90 пайыздан астам төмендеді.

Бүгінде ата-аналардың баласын өмірінің алғашқы айларынан бастап түрлі қауіпті аурулардан қорғауға толық мүмкіндігі бар. Вакцинация – бұл жай ғана медициналық шара емес, ол бүкіл отбасының ұзақ мерзімді денсаулығы мен қауіпсіз болашағына салынған маңызды инвестиция.