О. Бөкей атындағы орталық қалалық кітапханасында облыстық Ардагерлер кеңесінің ұйымдастыруымен «Егемендік туралы декларация және оның тәуелсіз Қазақстанның қалыптасуы мен дамуындағы рөлі» тақырыбында дөңгелек үстел өтті,- деп хабарлайды Altainews.kz тілшісі.
Шара ел тарихындағы маңызды кезеңдердің бірі – тәуелсіз мемлекеттің қалыптасуы мен дамуында маңызды рөл атқарған Қазақстанның Мемлекеттік Егемендігі туралы Декларацияны қабылдауға арналды.
Дөңгелек үстелге ардагерлер, тарихшылар, қоғамдық ұйым өкілдері, педагогтар мен студенттер қатысты. Жиын барысында қатысушылар 1990 жылғы 25 қазанда қабылданған декларацияның Қазақстан Республикасының егемендігі мен тәуелсіздігіне алғашқы қадам ретіндегі маңыздылығын талқылады. 

Спикерлер декларацияның қабылдануы елге өзінің сыртқы және ішкі саясатын дербес анықтауға, сондай-ақ ұлттық бірегейлікті қалыптастыруға мүмкіндік бергенін ортаға салды. Облыстық Ардагерлер кеңесінің төрағасы қатысып отырған ардагерлердің көпшілігі осы оқиғалардың куәсі болғанын және мемлекеттің дамуына өз үлестерін қосқанын тілге тиек етті. 
Жиын соңында аға буын мен жастар Қазақстанның егемендігін одан әрі нығайту және жас ұрпаққа сол тарихи оқиғалардың маңыздылығы туралы ой алмасты. 

Ақерке Рағызбаева