Президент Қасым-Жомарт Тоқаев Қазақстан халқына арнаған Жолдауында жаңа министрлік құрылатынын мәлімдеді. Ол қазіргі Цифрлық даму, инновациялар және аэроғарыш өнеркәсібі министрлігінің негізінде жасақталмақ, деп хабарлайды Altainews.kz тілшісі.

Мемлекет басшысының айтуынша, жаңа орган жасанды интеллектіні дамытуға және оны өмірдің барлық саласына жедел енгізуге серпін береді. Сонымен қатар басқару тиімділігін арттырып, Қазақстанды цифрлық мемлекетке айналдыруға ықпал етпек.

Министрлікті вице-премьер деңгейіндегі маман басқарады. Алдағы үш жылда Қазақстанның басты мақсаты – толыққанды цифрлық мемлекетке қадам басу. Бұл бағыттағы алғашқы қадам – Цифрлық кодексті қабылдау болмақ.

Сонымен бірге Президент Заңсыз активтерді қайтару комитетінің атауын өзгерту туралы бастама көтерді. Ол жаңа органды Инвесторлардың құқығын қорғау комитеті деп атауды ұсынды.

Үкімет басшысы Олжас Бектеновке 10 күн ішінде инвестицияға қатысты нақты ұсыныстар әзірлеу тапсырылды.