ШҚО тұрғындары табысты стартапты жүзеге асыруда.

Облыс әкімі Ермек Көшербаев "Еңбек" бағдарламасы бойынша гранттық қаражатқа ашылған кәсіпорындардың жұмысымен танысты, деп хабарлайды Altaynews.kz сайты.

Табысты кәсіпорындардың бірі - "Жанұя" фирмасы. Оның негізін көпбалалы ана Гүлжамал Бершімбекова қалаған. 400 АЕК көлемінде грант алып, ол белсенді түрде көпбалалы аналарды тарта отырып, шаштараз және тігін ісін оқыту курстарын, логопед кабинетін ашты. Енді қазір аналар нақты авторлық идеялар зертханасында жұмыс істейді. Олар ұлттық ою-өрнекті қолдана отырып, заманауи киім тігеді, көпбалалы отбасылардан шыққан балалармен айналысады.

Әлеуметтік кәсіпорынның өз жеңістері де бар. Солардың бірі - Томирис патшайымның ерекше авторлық костюмі. Бұл киім Абай облысындағы байқауда бірінші орынға ие болып, шеберлерге алты тігін машинасы сыйға тартылды. Гүлжамал Бершімбекова Самар және Риддер ауданында кәсіпорынның филиалдарын ашуды жоспарлап жүр. Фирмада тауарлар мен қызметтерден бөлек, көпбалалы аналарға консультативтік және қаржылық қолдау көрсетіледі.

Бірақ табысты бизнес ашатын аналар ғана емес. Кәсіпкерлікті дамыту жөніндегі 2021-2025 жылдарға арналған Ұлттық жоба аясында гранттар алғандардың арасында көпбалалы әке – Жетпісбек Бахат та бар. Мемлекеттік қолдаумен ол жабдық сатып алып, үш жұмыс орнын құра отырып, жиһаздар шығаратын цех ашты. Көбісі бұл көп емес деп айтар, бірақ кәсіпорынның ашылғанына бір жыл ғана болды және оның болашаққа жасалған жобалары мен даму жоспарлары бар. Қазір кәсіпкер мектептер мен балабақшаларды жиһазбен жабдықтауға арналған конкурстарға қатысуды жоспарлап отыр.

Грант алып дамыған табысты стартаптың тағы бір мысалы - газоблок өндірісі. Ағайынды Бақырбаевтар мемлекеттен 583 мың теңге алып, фирма ашты, қазір онда алты адам жұмыс істейді, кеңеюді жоспарлап отыр. Кәсіпкерлер қыста осындай сұранысқа ие құрылыс материалдарын шығару үшін цехті жабдықтады.

Ермек Көшербаев атап өткендей, өңірде ісін енді бастаған кәсіпкерлер "Еңбек" бағдарламасы бойынша гранттық қаржыландыру мүмкіндіктерін және басқа да мемлекеттік әлеуметтік қолдау жобаларын пайдаланады, перспективалы стартаптар бар, ең бастысы – өсу мен дамуға деген ұмтылыс керек.