ЖИТС-ті анықтайтын экспресс-тестті онлайн тапсырыспен алуға болады
1-ші желтоқсан Дүниежүзілік ЖИТС-ке қарсы күрес күні деп белгіленген. Осыған орай жыл сайын онкүндік өтеді. Биылғы онкүндіктің ұраны – «Қоғамдастыққа көшбасшылық».
Бүгінгі таңда адамның иммун тапшылығы вирусының (АИТВ) жыныстық жолмен жұғуы алдыңғы орынға шыққан. Облыста осы кеселді жүұтырғандардың 60 пайызы жыныстық қатынас арқылы, 37 пайызы инъекциялық есірткі арқылы жұқтырған. Бұл туралы өңірлік коммуникациялар орталығында өткен брифингте облыстық ЖИТС-ке қарсы күрес және алдын алу орталығының бас дәрігері Марина Жеголко айтты, деп хабарлайды Altaynews.kz тілшісі.
Бас дәрігердің айтуынша, қазір иммун тапшылығы вирусына тексерілудің заманауи жолдары көп. Соның ішінде экспресс-тестпен зерттеу тұрғындар арасында сұранысқа ие. Емханаларға баруға жүрексінетіндерге өз беттерімен тест тапсыруына болады.
Бас дәрігер тәуекел тобына жататындарға арналған профилактикалық шаралар туралы ескертті.
- Біз тәуекел тобына жататындарға, сондай-ақ ЖИТС жұқтырған адаммен тұрып жатқан, бірақ өз нәтижесі теріс адамдарға дерттің алдын алуға арналған спецификалық препараттар тағайындап, көмектесеміз. Бұл әдіс барлық өркениетті елдерде қолданылады, - деп толықтырды Марина Владимировна.
