Серебрянка қаласының М.Инюшин атындағы №1 орта мектебінде қыздар мен ұлдарға арналған шеберханалар жаңғыртылды. Мұнда оқушылар аспаздықтың, кесу, тігу мен жонудың қыр-сырын меңгере алады, деп хабарлайды  Altainews.kz тілшісі.

Айта кетейік, өткен ғасырдың 70-ші жылдарының ортасында салынған білім ордасында мұндай шеберханалар бұған дейін де болған. Алайда, арнайы сыныптардың өзі де, ішіндегі құрал-жабдықтары да әбден ескірген соң, соңғы кездері оқушылардың ата-аналары тарапынан шеберханаларды жаңарту жөнінде өтініштер жиі түсе бастаған. Халықтың өтініш-тілегін жерде қалдырмай, алғашқы болып үн қатқан «Казцинк» компаниясы болды. Шығысқазақстандық алпауыт кәсіпорынның әкімшілік мәселелер жөніндегі басқарушы директоры Андрей Лазаревтің айтуынша, компания әлеуметтік салаға қашан да айрықша мән берген. Әсіресе, өскелең ұрпақ үшін қажетті бастамаларға қолдауын аямаған. Дәл сондай жұмыстың жарқын мысалы ретінде Серебрянка мектебіндегі жаңарған шеберханаларды айтуға болады.

Осы ретте мектеп ішіндегі шеберханалар интерактивті тақта, әмбебап жұмыс үстелдері, тігін машиналары, ас үй, ұстахана мен жону жабдықтары сияқты барлық қажетті затпен жабдықталғанын айтқан жөн. Осындай сужаңа сыныптарда тәжірибе жинақтап, шеберлігін шыңдауға мүмкіндік алған балалар да, олардың мұғалімдері де «Казцинктің» тартуына ерекше мәз.

Жоғарыда жазғанымыздай, мектеп шеберханаларын жаңғырту «Казцинктің» демеушілік көмегінің арқасында мүмкін болды. Компания кабинеттерді жөндеуге және жабдықтауға 60 миллион теңге бөлген.

Нұржан Кенжеұлы